كود- وكالات//

مجموعة من الباحثين لاحظو بللي العيالات هوما الأقل عرضة للإصابة بفيروس كورونا المستجد، والأقل عرضة للوفاة كذلك، وعلى هذشي فكرو لا تكون الهرمونات اللي كيفرزوها النساء هي السبب فالنجاة ديالهم.

وحسب صحيفة “نيويورك تايمز”، فانطلاقا من هذ الفرضية، جرات كلية رينيسانس للطب في جامعة ستوني بروك فنيويورك، مجموعة من التجارب باش تحقن الرجال بهرمون الأستروجين، الهرمون الأنثوي اللي كيساعد فتطوير وتنظيم الجهاز التناسلي للأنثى، وكيلعب دور مهم فالخصائص الجنسية لخرى.

وابتداء من السيمانة الجاية، غادي يختابرو الباحثين فلوس أنجلوس هرمون جنسي آخر موجود بشكل رئيسي عند العيالات، واللي هو هرمون البروجسترون، وغادي يحقنو بيه مجموعة من المصابين الرجال، ونتظرو النتيجة.

وقالت سارة كَاندياري، طبيبة مختصة فأمراض الرئة فمركز “سيدار سناي الطبي” فلوس أنجلوس، بللي 75 فالمية من مرضى العناية المركزة المصابين بكورونا رجال، وبالتالي كتشوف بللي من الممكن يكون السبب فهذشي هو الهرمونات، وقالت بللي غيجربو حتى على مصابين اخرين ذكور حالة إصابتهم بكورونا خفيفة ومعتدلة، غتعطى ليهم جرعات مختلفة من البروجسترون.

وهذ التجربة غتدار على 110 مريض ب”كوفيد 19″ كيزورو غرفة الطوارئ وعندهم اعراض بحال الكحة والسخانة وضيق التنفس، وغيشوفو القدرة دالهرمون فالتقليل من شدة المرض وإزالة العدوى، وبداو الاطباء كيعطيو للمرضى هذ الهرمون، والنتائج ممكن تبان فماي ويونيو جايين.