نجوى المالحي-كود//

قضية البوسة “بوش آ بوش” بين الممثلة نسرين الراضي ولبنى آزابال مازال مابغات تسالي. بعض رواد الانترنت لي مازال ماكيفرقوش بين الفن، الحرية الفردية، ودخول سوق الراس، طلقو حملة باش يقاطعو مسلسل “الماضي لا يموت” لي كتمثل فيه الراضي وكيدوز يوميا في الاولى وعندو نسبة متابعة كبيرة.

الحملة لي باينة فاشلة ماشاركوش فيها بزاف، وكاين لي عندهم عقل وكيفكرو بيه، وماشي الموجة لي جات تديهم، دافعو على المسلسل لي في البطولة ديالو فاطمة خير ورشيد الوالي وأمين الناجي، وأكدوا أن نسرين الراضي حرة دير لي بغات، واصلا مادارت والو، ماقتلات حد ماشفرات حد، تباوسات هي وسيدة اخرى، فالقرن 21 ماخاصش تنوض الحيحة على بحال هادشي.

وكانت لبنى اعتذرات وحملات لنفسها مسؤولية البوسة لي قالت أنها سادجة وعفوية ومكانتش باغية تصدم بيها المغاربة في رمضان.