كريم الشركي-كود///

حزب بوكس فمنطقة الاندلس، ماعجبوش الحال علاش المغرب ماتسجلاتش فيه عدد حالات كبير كيف تجسلات فإسبانيا اللي انهار نظامها الصحي في ذروة مواجهة كورونا، ومابقاوش كيقدرو يشدو الناس فالسبيطارات.

رئيس الحكومة الاندلسية المنتمي للحزب الشعبي والمدعوم من بوكس، خوانما مورينو، قال أن أكثر جهة متضررة من عملية عودة مغاربة وجزائريي أوروبا لبلدانهم باش يدوزو العطلة، هي الجهة ديالو، وخاصو حتى هو يكون على علم بكل شيء متعلق بهاد العملية، خصوصا أن عودة هاد الجالية من شمال افريقيا بعد نهاية العطلة يقدر ينتج كارثة حقيقية، لأن عدد المهاجرين لي كيمشيو بالغ ثلاثة ملايين فرد.

خوانما اوضح أن هاد الناس يلا جابو معاهم كورونا من المغرب والجزائر غاتكون كارثة اخرى، وأن العودة ديالهم كيترصد ليها عدد كبير من الامن بجهة الاندلس.

رئيس بوكس فقرطبة واللي كيدعمو حكومة الاندلس، حتى هو دخل فهاد المعمعة وقال أن المغرب ماشي مستعد مزيان، والنظام الصحي ديالو ماشي حتى لتمى، وأن المعطيات لي كيقدم ماشي هي هاديك.

وطبعا بينو فالاخير حقدهم على لمغاربة ملي قال انهم كيتضامنو مع مليلية وسبتة لي كيخنقها المغرب.