كريم الشركي-كود///

حزب بوكس اليميني المتطرف فإسبانيا، مكيحملش يشوف دول شمال افريقيا وخصوصا المغرب، غادي تتفوق فشي حاجة، وخاصو ديما هاد الدول يكونو اقل من الاسبان.

الحزب المعارض، كيوجد واحد الاقتراح غايحطو أمام البرلمان، باش الحكومة ترفع ميزانية الجيش الاسباني ب2 فالمائة من اجمالي الناتج المحلي!.

وقال الحزب أن المغرب والجزائر ماشيين كيتسلحو بواحد الطريقة تصاعدية، والمغرب رجع عندو 200 الف جندي، هادشي كيخليه فمصاف الجيوش فشمال افريقيا، والبلدين (المغرب-الجزائر)، واخا كيتعتابرو أصدقاء إسبانيا، ولكن الصبليون حسب بوكس خاصهوم يحافظو على الريادة فحوض المتوسط، ومايكون حتى جيش أقوى منهوم.

وحث بوكس على اعادة تقوية العلاقات مع الولايات المتحدة، لي علاقاتها قوية بزاف مع المغرب، في حين ان اسبانيا كحلتها معاهم سنة 2004 ملي نساحبات من العراق من جانب واحد.