أحمد الطيب – كود الرباط //

حزب الاستقلال وقيادته خصوصا لحدود الساعة مزال صارطة لسانها من تحديد السن الأقصى لاجتياز مباريات ولوج مهنة التدريس في 30 سنة. هاد الموضوع شاغل بال كولشي ونوض احتجاجات مختلفة وكاين اللي مع وكاين اللي ضد.

البارح السبت تنظم المجلس الوطني لحزب الاستقلال. الأمين العام نزار بركة ماقال ولا جملة واحدة على هاد الاحتجاجات اللي نايضة على قرار وزير التربية الوطنية المذكور و اللي خالق نقاش وسط المجتمع المغربي. ماقال والو. إيه حنا عارفينك في الحكومة وداير التضامن الحكومي. لكن خاصك تهضر. تقول أه الاستقلال مع الوزير شكيب بنموسى أو العكس. المهم تعبر على موقف. الكثيرون كيسولو فين هو نزار بركة اللي كان كيهضر مني كان ف المعارضة؟  دغيا تقلبات الأحوال؟

قيادي استقلالي هضرات معاه “كَود” أكد باللي هاد الموضوع شاغل عدد من أفراد قيادة الحزب وكاين اللي هضر عليه، فيما ذهب مصدر آخر إلى أن حزب الاستقلال في الأغلبية الحكومية والحكومة عندها ناطق رسمي ديالها يقدر يهضر على هاد الموضوع ويعبر فيه على الموقف الحكومي.

وأضاف المصدر نفسه لـ”كَود” قائلاً: “الحزب مع الحكومة والأمين العام رزين وبرزاته جاب النتائج وهذا هو الأهم”.

نقابة الجامعة الحرة للتعليم، المنضوية تحت لواء الاتحاد العام للشغالين بالمغرب (نقابة الاستقلال) بوحدها اللي تابعة للحزب وكانت عندها الجرأة تهضر على هاد الموضوع وتعطي موقف واضح من نقاش “زلزل” كلشي.

الجامعة عبرت عن رفضها الصريح للمعايير المستجدة لمباراة التعليم لهذه السنة التي ‏اعتمدتها الوزارة بشكل اعتبرته “انفرادي يتنافى وروح المقاربة التشاركية” التي استهل بها الوزير ولايته ‏التدبيرية على رأس القطاع.

وأكدت الجامعة، في بلاغ لها، توصلت به “كَود”، على التعارض الواضح بين هذه المعايير والمبادئ والتشريعات ‏الجاري بها العمل بخصوص ضمان تكافؤ الفرص وتمكين الشباب خاصة من المشاركة الواسعة في ‏التنمية المجتمعية، وهو ما يستدعي مراجعتها وفق منظور يضمن ويعزز هذه المشاركة.‏