كود علي الصافي العيون ///

البارح السبت تعقد جمع عام استثنائي لناشري الصحف بالجهات الثلاث للصحرا العضو في الفيدرالية المغربية لناشري الصحف بالعيون. الاجتماع اللي تقرر فيه احداث 3 تنسيقيات عوض واحدة اللي كانت قبل٬ بغى يدخل فيه حزب الاستقلال ويفرض مرشحو على رئاسة تنسيقية جهة العيون.

وفق ما علمته “كود” فان النعم ميارة الكاتب العام للاتحاد العام للشغالين بالمغرب الذرع النقابي لحزب الاستقلال ما خلاش من جهدو باش يدعم مرشح بعينو. دار اتصالات ورسل ميساجات وووو.

حزب الاستقلال باغي يتحكم فكلشي عندو علاقة بالصحرا. نقابة ديال العمال وتنسيقيات ديال الباطرونا وحتى الصحافة طمع فيها.

تدخلات النعم ميارة وفق مصادر ل”كود” ما عطات والو. فشلات وطلع مرشح اختاروه اصحاب المواقع والصحف بجهة العيون الحافظ ملعين بالاغلبية.

دابا هاد الحزب خسر هاد المعركة. فاللخر كلشي هنأ كلشي وتعانقو المرشحين كيف كتبين الصورة اللي تنشرها “كود” فهاد المقال