مصطفى الشاذلي – كود//
جمهور النادي القنيطري نزل على نور الدين الحلوي بالسبان والشتائم فالماتش لي جمع الكاك بشباب أطلس خنيفرة، ضمن منافسات الدورة الثانية من منافسات البطولة.
الجمهور هاجم الرئيس الحلوي فالمنصة الشرفية وطلب منو يبعد من الفرقة واخا يلاه جوج الماتشات عندو مع الكاك، بعد انتخابو رئيسا بلاصت بلعيد كروم.
الجمهور ما كانش راضي على تعادل النادي القنيطري أمام شباب أطلس خنيفرة زيرو لزيرو، وبدا على الرئيس بالسبان. وأكثر من ذلك طلبوا منو يقدم استقالتو، لأنه ماصالحش يكون رئيس للنادي القنيطري.
البوليس اضطر إلى التدخل لحماية رئيس الفريق وخرجوه من الملعب بصعوبة، لأن الجمهور كان غاضب عليه بزاف وخافوا عليه من اي اعتداء.
مصادر “كود” أكدت أن هاد الحملة على رئيس الكاك يمكن يكون وراها شي وحدين باغيين الخدمة فيه، لأنها جات مباشرة بعد انطلاق منافسات القسم الثاني.
هادشي غادي يستمر بكل تاكيد، لأن الرئيس الحالي مالاقيش الدعم من جميع الانصار واخا السلطة مدعماه.
