كود-بروكسيل//

قالت جمعية بورود البلجيكية اللي كترسل متطوعين للمغرب من الشباب مابين 15  و 18 سنة بتنسيق مع جمعيات محلية انها باستشارة مع سفارة بلجيكا ف المغرب و وزارة الخارجية البلجيكية قررو يوقفو جميع اعمال التطوع ف المغرب

هادشي بعدما تعرضو ليه هاد الاطفال و الشباب من تعليقات مسيئة ف الفايسبوك و تهديدات داعشية وصلت لحد تعليق  بقطع الرؤوس و تعليق مسيء من طرف برلماني من البيجيدي اعتبرهم جزء من مؤامرة ما على الاخلاق و الاسلام..

وقال مصدر من الجمعية لكود ان المتطوعين االلي كاينين دابا  فالمغرب كايحرسوهم الدرك الملكي ف دوار ف تارودانت  بعدما بلغوهم الاباء خوفهم على ولادهم بعد التهديد بقطع الرؤوس ..وقال ان عدد المتطوعين  حاليا 37  منهم 3 بغاو يرجعو جالا بعدما انتباتهم حالة فزع و ان فريق من السفارة البلجيكية كايتبع امورهم ..

نفس المصدر قال انهم عارفين المغرب كيف داير من ناحية الامن و استضافة المتطوعين  و انهم ل15 سنة ماشافو الا الخير ف قرى تارودانت  و جمعياتها و ان سلامة المتطوعين ديما مضمونة من السلطات المحلية و اعضاء الجمعيات المغربية ولكن  فاهمين ان مايحدث حاليا مجرد فقاعات اعلامية و لكن خصهم رغم ذلك  ياخدو احتياطاتهم بعدما كبرات قضية هاد التعليقات اعلاميا  على المستوى الدولة ووتعرضو لضغوط من طرف الاباء و اولياء الامور.

و اصدرت الجمعية بلاغا  كتبلغ به المتطوعين و اسرهم بهاد المستجدات.

رابط البيان