كود القنيطرة//
يبدو أن وزارة السكنى فقدت السيطرة على مشاريع السكن الاجتماعي التي أنجزت في إطار شراكة مع الخواص. النموذج من مدينة القنيطرة. شقق السكن الاقتصادي اللي تبنات فإطار شراكة ما بين العمران ووزارة السكنى والمنعشين العقاريين الخواص، ولات كتباع بثمن أكثر من الثمن المحدد فأقل من 20 مليون وتحديد بـ 18 مليون.
المنعشين الخواص عطاتهم الدولة فشخص وزارة السكنى والعمران الأرض مقابل فابور مقابل يبنيو شقق للسكن الاقتصادي بثمن رخيص ويبيعوها لذوي الدخل المحدود، مقابل ياخذوا أراضي يبنيو فوقها شقق تباع بـ 25 مليون سنتيم.
هاذ الاتفاقية فيها دفتر شروط محدد الالتزامات ديال كل طرف و اللي دارت فعهد نبيل بنعبدالله واستفادوا منها منعشيين كيمارسو السياسة كمنتخبين.
أول خرق لدفتر الشروط هو عدم احترام المدة المحددة للانجاز، والمبرر صعوبات كيرددها المنعشون.ثاني خرق هو عدم احترام ثمن البيع اللي محدد ف18 مليون واللي طلع ل 21 و يقدر يوصل حتا ل 25 مليون سنتيم.
هاذ الخرق مكانش ممكن يوقع بدون تواطؤ الوحدة الإقليمية للعمران بالقنيطرة، و اللي سمحات بتمديد الاجل، بعد تدخل بعض المنعشين لدى عامل القنيطرة، وفنفس الوقت مقدراش دير التتبع ديال هاذ الورش.
مندوبية السكنى فالقنيطرة اللي تابعة للوزيرة بوشارب كتشكى حتا هيا من تدخلات من الفوق ومن التلفونات اللي كتحرك لفائدة البعض، وأنها مصلحة خارجية تابعة لوزارة السكنى واخا شي وحدين كيقولوا بأن إعفاء واحد المسؤول بوزارة السكنى فعهد بوشارب خفف من التدخلات.
من جهة بعض المنعشين استغلوا تدخل العامل لانجاز هاذ الورش وتذليل الصعوبات للتمادي في خرق بنود كثيرة بدفتر الشروط والتحملات.