وكالات //

إدارة مكتبة فجزيرة صحراوية فالمالديف، سميتها “Kunfunadhoo” فالمحيط الهندي، كتقلب على بائع كتب بشرط أنه يكون ديما حفيان وكيعشق هاد المهنة باش يخدم فواحدة من أفضل الوظائف فالعالم، كيف سماوها.

جورنال “الكَارديان” البريطاني اللي جاب الخبر قال أن صحاب المكتبة بغاو شخص يبقى يبيع الكتوبة ويمشي حفيان (Barefoot bookseller)، لأنهم خدامين بكونسيبت “شعار الجزيرة: لا صبابط ، لا أخبار. هادشي اللي كيشجع الناس على الرجوع للاتصال مع الطبيعة”.

المعني بالأمر غادي يخدم بصالير كيوصل ل750 دولار فالشهر، بالإضافة للتدويرات اللي ممكن ياخد من عند الكليان اللي كيزورو الجزيرة، واللي ضروري ما يجيو يطلو على المكتبة، خصوصا العاشقين منهم للمطالعة.