محمد سقراط-كود///

بالنسبة ليا عهد الحسن التاني تقريبا خمسين عام ضاعت على المغرب في الصراعات السياسية والمشاكل ، وفي المقابل التنمية والتطور مادارت فيهم البلاد والو، بل العكس هادوك المدن الجميلة المتحضرة لي خلات فرنسا رجعوا عروبيات كبيرة، وعمرو المدن بالكاريانات والبرارك والبناء العشوائي، طنجة مثلا كانت عامرة كاريانات وفي احسن الأحوال احياء عشوائية، وكنتي الى غبتي على شي مدينة ورجعتي ليها غادي تلقى التغير الوحيد لي وقع هو العشوائيات والكاريانات، وهادشي بقا حتى للالفينات، حقا الحسن التاني كاني انسان مثقف وخطيب مفوه واستراتيجي وقائد عندو كاريزما وزيد وزيد، ولكن التطور والازدهار لي عرفو المغرب في عهد محمد السادس راه كبير بزاف وباين للعمى وحياة المغاربة في المدن والدواور والعروبيات تحسنات بزاف فعهد محمد السادس، وهادشي وقع بلا دوك الخطابات بلا ورقة لي فيها السب والتهديد لفئة من الشعب بلا الحوارات الصحافية مع الأجانب بلا داكشي ديال الحسن التاني ختارع النص في الفرونسي، مكاين غير الدق والسكات وحب الناس بلا خوف، بل حب الملك خرج الحدود وكيبغيوه المواطنين ديال دول أخرى وكيحسدو المغرب عليه، لأنه ملك انساني وعطوف وغادي بالبلاد مزيان، حيت رجل أعمال حقيقي وعارف شنو لي كيفيد الشعب بلا قوة الهدرة، والشعب براسو عارف هادشي.

المحاماة هي أكثر مهنة حضورا في السياسة ومن قرون هادي الناس ديال القانون هوما لي كيديرو السياسة وكيعرفو عليها، ولكن دابا جا الوقت ديال رجال الاعمال الناس لي عندهم عقلية تجارية ماشي قانونية، الناس لي كيروجو البلاد ويحلقوا مناصب شغل ويديرو الصفقات ، ويدخلو في منافسات مع شركات عالمية ويربحوهم والناس لي معندهمش مع لغة الخشب ولعل وما فاتئ ومانفك وكاع داك الهدرة ديال التلاوة، شوف غير ترامب نهار حكم ميريكان كانت وحدة من أزهى الفترات في التاريخ الحديث، مكاين غير السلام والبيع والشرا والتجارة وهاك وارا مافيها حزارة، طبعا مكندويش على رجال الاعمال البزنازة لي جابوها باردة وكيديرو مشاريع كلاسيكية قهوة مطعم شري الأراضي والعقار وطلع السوق على الموظفين بلا حتى شي استفادة للدولة، كندوي على رجال الاعمال ديال بصح صحاب المشاريع لي كتخدم الالاف بشكل مباشر وغير مباشر وكتفيد ماليها والبلاد والعباد.

العرب والمسلمين براسهم راه في قمة الازدهار ديالهم كانوا تجار ومتحكمين في التجارة العالمية، مصر متحكمة في التجارة مع الهند المغرب متحكم في التجارة مع افريقيا وديال اسيا متحكمين في التجارة مع الصين عبر طريق الحرير، البندقية كانو دويلة عظمى غير بالتجارة، أوروپا براسها نهار غادي تبدى فيها الحضارة والنهضة كان الهدف هو البحث على طرق تجارية مستقلة على العرب والمسلمين وكيفاش يوصلو للهند وافريقيا بلا ميحتاحو المسلمين، وهاكة دارو على رأس الرجاء الصالح وكتاشفوا ميريكان ومشاو بعيد.

في السنوات السابقة جربنا المحاميين والأطباء والمهندسين والفلاحة والبزنازة والأساتذة الجامعيين والفقهاء والمعلمين والدعاة ، والنتيجة كانت سنوات ديال الضياع والفلوس كتشتت بلا فايدة، جا الوقت فين نجربو رجال الاعمال والناس لي عندها عقلية تنافسية وباغين يديرو لاباس ويضوبلو الثروة ديالهم ومعاها يخدموا المغاربة ويديرو لاباس، الناس لي معندهاش مع تاحراميات السياسة والبوز الخاوي، وعندهم غيرة على بلادهم وفيها مستثمرين رزقهم ، عقلية خلق الوظائف وجلب الاستثمارات ماشي عقلية الولاء وتاعطايت للأجانب بدعوى أمة واحدة دين واحد مصير واحد.