احمد الطيب كود الرباط ///

الرد على توقعات بنك المغرب ف2023 بخصوص نسبة التضخم جا من وكالة دولية للتنقيط الائتماني اللي هي “ستاندار اند بورز”. فتقريرها الفصلي اللي خرج البارح الجمعة 31 مارس بنيويورك٬ توقعات هاد الوكالة باللي نسبة التضخم فبلادنا غادية وتنخافض وغادية ما تفوتش 4.5 فالمائة هاد العام. النظرة الايجابية لهاد الوكالة اللي حافظات على المغرب كبلد “مستقر”٬ مختالفة مع التوقعات اللي دارها بنك المغرب براسو

بنك المغرب زگلها جوجت المرات فنسبة التضخم. اللولى باش توقع هادي مدة باللي نسبة التضخم فعام 2023 غادية تكون 3.5 بالمائة قبل ما يعدل هاد النسبة قبل ايام ويحددها ف5.5. جوجت النقاط ديال الفرق. بزاف.

دابا هاد الوكالة اللي تنقطيها كيخليك تاخد قروض دولية وكيتحكم فنسبة الفائة والشروط٬ كتقول 4.5 بالمائة نسبة تضخم وبنك المغرب زاد عليها بنقطة. اذن الوكالة كذبات المؤسسة المالية المغربية.

يمكن لجواهري سالى وقتو وخاصو يمشي يتصنت لعظامو بحالو بحال عدد من المسؤولين المغاربة

فتقريرها الفصلي اشادت هاد الوكالة الدولية بالاصلاحات الهيكلية اللي كيدير الحكومة وهدرات على افاق النمو الواعدة بالمغرب كتدعمها اصلاحات هيكلية بدات فالتطبيق مع خيارات اقتصادية واستثمارية متنوعة. كما وضحات باللي الانتاج الداخلي الخام للمغرب غادي يوصل ل3.5 بالمائة ف2023 ول3.4 بالمائة ف2024 و2026 وتوقعات توصل نسبة التضخم ف2026 ل2 بالمائة