عفراء علوي محمدي- كود//
بحال العادة كل أسبوع، دار سوق الجملة للفواكه والخضر التابع للمجلس الجماعي لمدينة كازا، ليست ديال الأثمنة الخاصة بالمنتوجات الفلاحية اللي كيتباعو بالكَرو، باش يحدد السقف ديال الأثمنة والثمن الأدنى ديالها حسب جودة كل منتوج، وماتكون حتى شي زيادة فهذ الوقت اللي كتعرف البلاد حالة طوارئ صحية بسبب فيروس كورونا المستجد، وهذ السيمانة غتكون متميزة لكونها عرفات تخفيف للحجر فجميع المناطق فالمغرب.
بالنسبة لثمن اللحم بالجملة فالباطوار ديال كازا فالثمن ديالو عرف انخفاض كبير بالمقارنة مع السيمانة اللي فاتت، لحم الغنمي نقص بخمس دراهم، ولا يدير دابا فالثمن الأدنى 45 درهم والثمن الأقصى 52 درهم للكيلو، والبكَري نقص بسبعة دراهم، وولا الثمن ديالو الأدنى كيدير 46 درهم، والثمن الأقصى 55 درهم للكيلو.
أما بالنسبة للفواكه، كلها عرفات استقرار باستثناء ثمن لافوكا اللي عرف انخفاض كبير: وبالتالي ولات كتدير 11 درهم فالثمن الأدنى و22 درهم فالثمن الأعلى، بينما الفواكه الأخرى: البانان داير 8 دراهم الثمن الأدنى و11 الثمن الأقصى، البنان دالبلاد 5 دراهم فالثمن الأدنى و7 دراهم ونص فالثمن الأقصى، الليمون 3,50 دراهم فالثمن الأدنى و5 دراهم ونص فالثمن الأقصى، والتفاح دالبلاد 2 دراهم ونص فالثمن الأدنى و8 دراهم فالثمن الأقصى، والتفاح المستورد 8 دراهم والثمن الأدنى و13 درهم فالثمن الأقصى، 90 سنتيم أقل ثمن و2 سنتيم فالثمن الأعلى.
أما الخضرة، فمعظم الأثمنة ديالها استقرات، وحدد السوق الأثمنة ديال الخضرة الأساسية بالكيلوكَرام ف: ماطيشة 90 سنتيم فالثمن الأدنى و2 دراهم و30 سنتيم فالثمن الأقصى، وخيزو 80 سنتيم فالثمن الأدنى ودرهم و50 سنتيم فالثمن الأقصى، البصلة 3 دراهم ونص فالثمن الأدنى و5.50 دراهم فالثمن الأقصى، باطاطا 1 درهم ونص فالثمن الأدنى و2 دراهم فالثمن الأقصى، البصلة الخضارية 70 سنتيم فالثمن الأدنى ودرهم و50 سنتيم فالثمن الأقصى.
وبخصوص الخضر لخرى حتى هي نفس الأمر، المكور أو الكرومب كيدير 60 سنتيم فالثمن الأدنى و1 درهم و20 سنتيم فالثمن الأقصى، والكَرعة الخضرة كتدير 2 دراهم فالثمن الأدنى و4 دراهم فالثمن الأقصى، والخيار 1 درهم فالثمن الأدنى و2 درهم فالثمن الأقصى، والدنجال 70 سنتيم فالثمن الأدنى ودرهم و30 سنتيم فالثمن الأقصى، والكَرعة الحمرا 2 دراهم فالثمن الأدنى و4 دراهم ونص فالثمن الأقصى.
