24/04/2024 17:00
الكابرانات خسرو ماتش جديد مع المغرب: الكاف حكم بخسارة USMA مع بركان بسبب الحجز على تونيات الفريق المغربي
سهام البارودي – كود//
العام لي جا يلقا السيتكومات المغربية فرمضان كاتحاول ضحك عباد الله بواحد الصورة كاريكاتورية للعروبي و العروبية ( السيد القادم من البادية) ! واش ماكاينش شي طريقة اخرى باش ضحك عباد الله من غير هاد تبهلوانيت ؟ ماكاينش شي افكار اخرى ؟ صافي العام لي جا تجيبو لينا شي حد خارگ طاگية متقوبة و كايبدا هضرتو ب”هاو” ” توما” و كايخرج ليه الدفال من فمو….
و الطامة الكبرى انه هاد الصورة لي كايروجو ليها هاد الناس صورة قديمة ! أكل عليها الدهر و شرب ! شفناها فالتسعينات مع الخياري و فهيد و الناصري و ثلاتين عام من بعد ! ثلاتين عام من بعد مازال الصورة لي كايروجو ليها الأعمال التلفزية المغربية هي هي ماتبدلاتش!
تفرجت فجوج ديال السلسلات ” همي ولاد عمي” ” و علال و كاميليا ” و بجوج كايروجو نفس الصورة ديال العروبي المكلخ، العروبي الهبيل، لي ماكايعرفش يهضر، و لي ماكايعرفش يلبس ! طاگيتو متقوبة و لابس خنشة ديال الدگيك و حال فمو و مبهوض بداكشي لي كايشوفو فالمدينة…
مايمكنش فثلاتين عام مايطرا تا تغيير فصورة العروبي بالرغم انه فهاد ثلاتين عام راه بزاف ديال التغييرات السوسيولوجية و الاقتصادية طرات فالمغرب !
اليوم اكثر من ستين فلميا ديال سكان المغرب ساكنين فالمدن عكس التسعينات لي يا الله النص تقريبا لي كان ساكن فالوسط الحضري حسب المندوبية السامية للتخطيط !
ثلت الساكنة ساكنة بين لاكس كازا-الرباط
ماننساوش انه الضو دخل للديور بشكل كبير و اليوم ٩٩ فلميا ديال العالم القروي فالمغرب عندو الضو بمقابل 18 فلميا 1996 و لي كايقول الضو كايقول التلفزة، التيليفون، البارابول، النيميريك، بنادم كايشوف شنو طاري فالعالم!
هادشي بلا ماننساو ثورة الأنترنيت و وسائل التواصل الاجتماعي لي دخلو لگاع الديور ! التيليفونات رخاصو ! السمارتفونات غرقو السوق ! الانترنيت ابتداءا من خمسة دراهم هانتا مكونيكطي و تانتا بفايسبوكك بآنستاغرامك بسناب شاتك، دير سيلفي و تبارطاجيه مع العالم كامل و نتا متكي على نادر ديال التبن !
حوايج بزاف تبدلو من التسعينات لدابا و صورة العروبي فالمخيلة ديال مالين الانتاجات الرمضانية هي هي ! و تقول واش بغاو يبدلو شي مجهود و يفكرو فشي حاجة اخرى.
ايه البادية المغربية ماشي هي البادية ديال السويد ! و لكن راه مظاهر البداوة و الكالاخ و الوسخ و “هاو تشوما..” راه كاينين غا فالمدن فالأحياء الشعبية و العشوائية و هوما نتيجة ديال التربية اكثر ما هوما نتيجة ديال ‘فين ساكن؟’ ! راه بنادم ساكن ف” كازا” و كاتلقاه هروي بينو و بين الحضارة سنوات ضوئية و تقدر تلقا انسان ساكن فالبادية و متع مع راسو فشي ميتين ميترو بالجردة بلابيسين و عندو سمارت تيفي فالدار و ايبي تيفي و مكونيكطي بالكاط جي من آيفون !
حيدو من راسكم الكالكير شي شوية وواكبو التطورات المجتمعية باش المنتوج الفني يكون عندو مصداقية ! راه لا كنتو غا كاتمشيو تشريو الحوالا من السوق فالعيد الكبير غاتشوفو شحال ديال ” الكسابة” هازين السمارتفونات فيديهم !
