اسماء غربي كود ////

التغيير فالاعلام العمومي تعطل بزاف. تصورو دابا فيصل لعرايشي الرئيس المدير العام للشركة الوطنية للاذاعة والتلفزيون عندو تقريبا 20 عام وهو فهاد المنصب. بحالو بحال الملك محمد السادس علي العرش. راها ماشي حشومة راها شوهة. ما نهدروش على اش دار وغير علاش طول هاد الشي كولو. لهاد الشي التغيير كيف كشفات “كود” الاسبوع اللي فات٬ قريب.

ماشي غير هو اللي كيتوقع يتغير. كاين مدراء كثار بعدا فهاد الشركة الوطنية غاديين يتبدلو ولكن هادا غادي يكون قرار المسؤول الجديد ماشي قرار شي حد اخر ولكن اللي محتمل غاي يشملو التغيير كاين وكالة المغرب العربي للانباء. دارو للمدير الحالي خليل الهاشمي مشاكل كثيرة واخا السيد خدم وتقاتل. خليل كيموت على الصحافة المكتوبة واكيد راجع ليها بعد انتهاء هاد التجربة ديال “لاماب”. وكاين التغيير حتى ف”دوزيم”.

دابا شكون ممكن يعوض هادو؟

نبداو بالشركة الوطنية للاذاعة والتلفزة. ممكن يجيها واحد عندو تجربة فادارة القنوات بحال نور الدين الصايل اللي كان فمدوزيم. ممكن يجيها شي بروفيل من شركات الانتاج. هاد الشي تجرب مع فيصل لعرايشي ومع صارم الفاسي الفهري فالمركز السينمائي المغربي. ممكن يكون واحد عندو الخبرة بحال بنعيسى عسلون المدير العام للاتصال السمعي البصري والاستاذ المعروف فالمعهد العالي للاتصال والاعلام بالرباط. ممكن يكون اللي سبقو فالملف محمد الناجي واخا هادا صورتو خايبة بزاف ومشاكلو كثار.

وكالة المغرب العربي للانباء ممكن حسب توقعات “كود” يجيها شي ناشر من مدراء الصحف المغربية المعروفة. يعني تكون تجربة خليل الهاشمي مرة اخرى. ممكن يكون ولد الدار من الوكالة. هنا كاين اسماء كثيرة مرشحة. ممكن تكون سميرة سيطايل مديرة الاخبار ف”دوزيم” ونائبة المدير العام للقناة. هادي داخلة فالتغييرات. يعني ما غادياش تبقى فبلاصتها. المخزن ما يفرط فيها.

ف”دوزيم” ممكن يتعين المدير العام من ولاد دوزيم. محمد مماد مدير الامازيغية ممكن يولي مدير ديال هاد القناة كيفما ممكن يجيبو بروفيل تقنوقراط كيعرف غير التسيير. من المرشحين اسماء اللي تعطي للقناة شوية المعنى بحال مدير الاخبار فعهد الصايل والاعلامي المعروف نجيب رفايف. خدم بزاف علي خلية الدراما.

فهاد المناصب المفاجأة حاضرة. التخمينات ما كتصدقش