كود – عن موقع سباي تولك//

ف17 غشت ديال  العام اللي فات، نشر المقاتل المغربي/الألماني أبو بكر زعيتر تصويرة ليه على الصفحة ديالو فأنسكَرام مع ريتشارد گرينيل، سفير الولايات المتحدة فألمانيا فداك الوقت، بانو واقفين فالمدخل ديال السفارة الأمريكية فبرلين وهوما معانقين.

كتعليق مع التصويرة كتب أبو زعيتر: “دوزت وقت زوين مع السفير ريتشارد گرينيل”، وشكرو على الاستضافة والباب اللي فتحو ليه، بلا مايوضح آشمن باب فتح.

لكن مصادر ديبلوماسية جابت التبركَيكَة لموقع SpyTalk الامريكي بأن گرينيل كان عندو دور مهم باش يدخل زعيتر لميريكان فالخريف اللي فات، واخا عندو ماضي إجرامي عنيف ودخل للحبس فألمانيا، وكان، واخا كتربطو علاقات صداقة قوية مع الملك محمد السادس، رفض مكتب الشؤون القنصلية بوزارة الخارجية الأمريكية يعطيه التأشيرة ثلاث مرات بسبب السوابق ديالو، جوج مرات فألمانيا، ومرة فالمغرب.

وفداك الوقت، وحسب مصدر ديبلوماسي ديال موقع SpyTalk دائما، فالملك محمد السادس، اللي كان على علاقة صداقة وطيدة بالمقاتل المغربي، ماكانش عجبو الحال ماياخدش أبو زعيتر التأشيرة فاللول، لأن هذشي دمر خططهم باش يسافرو بجوج للولايات المتحدة العام الماضي.

ومن بعد الرفض الثالث فالصيف اللي فات، رجع زعيتر لألمانيا وهضر مع گرينيل نيشان، وبالزربة، وفظرف سيمانات قليلة، خدا التنازل، ودخل لميريكان فأكتوبر.

وسياسة الهجرة الأمريكية ديما عندها نصيب من المحسوبية للمشاهير والمرفحين، لكن گرينيل، اللي هو رجل كيفتخر بمثليتو الجنسية، وموالي كبير لترامب وسياسي كبير، غيتدخل باش يسهل الحصول على الڤيزا ديال ميريكان للمقاتل اللي عندو ماضي إجرامي، وهذشي كيتعارض مع خطابات حملة ترامب وسياستو، لكن كيفما كيقول ترامب نيت “كاينة ديما استثنائات مع الأصدقاء”.

وبقا زعيتر على اتصال مع گرينيل، اللي استقل من منصبو كسفير فألمانيا من بعد ما عينو ترامب مدير بالنيابة للاستخبارات الوطنية، وهو دابا المبعوث الخاص للرئيس إلى صربيا وكوسوفو، وسافر من بعد للمغرب فالسيمانة اللي فاتت باش يتلاقى الملك، وقال مسؤول رفيع فميريكان أن سبب الزيارة مامعروفش، لكن كاينة هضرة على التدخل من أجل إدارة عملية تطبيع المغرب مع إسرائيل.

رامين أسگارد، وهو دبلوماسي أمريكي كبير سابق ومحامي هجرة ساكن فتامبا، قال لـSpyTalk أنه بحال هاد التنازلات، المعروفة داخليا باسم استثناءات “212” ، من المستحيل الحصول عليها ، وهذا كيعني أن گرينيل يقدر يكون استخدم علاقتو بالرئيس ترامب نيشان وكبار المسؤولين لخرين باش يعاونو زعيتر فاستلام الإعفاء.

وبمجرد ما نشر موقع SpyTalk على المقاتل أبو زعيتر هاد المعلومات، وفضح علاقتو بالسفير الأمريكي السابق فألمانيا، حذف المقاتل المغربي كَاع التصاور ديالو مع السفير فحسابو على “أنستكَرام”.

المقال كامل على كيفاش دخل ابو زعيتر لميريكان وعلاقتو بگرينيل هنا:

https://spytalk.substack.com/p/the-diplomat-and-the-cage-fighter