كود علي الصافي العيون ///

الاثنين 28 يونيو تلاقى وزير خارجيتنا ناصر بوريطة مع وزير خارجية امريكا انطوني بلينكن فروما على هامش الاجتماع الوزاري للتحالف الدولي ضد داعش التابع للامم المتحدة. فهاد الاجتماع غادي يكذب بوريطة علينا وما يقولش كلشي علي الاجتماع. فرشو تويت دارو بلينكن. قال باللي هدرو على مواضيع حقوق الانسان وحرية الصحافة في المغرب بالاضافة الى قضايا كتهم المصالح المشتركة. 

رئاسة بايدن من النهار الاول كانت واضحة. الاستمرار فالاعتراف بمغربية الصحراء ماشي شيك ابيض. خاص المغرب يكون بلد حقوق الانسان ويدافع على حرية الصحافة ماشي يحاكم الصحافيين بتهم ما داخلاش لعقلهم بحال هتك عرض مثلي كما فقضية سليمان الريسوني او الاغتصاب كما فقضايا توفيق بوعشرين وحاليا عمر الراضي. 

تصورو هاد الشي قالتو الخارجية الامريكية والادارة الجديدة للبيت الابيض. بوريطة كيف كيدير ديما كيكذب اما كيزيد امور ما كتكونش فبيانات وزراء الخارجية اللي كيتلاقاهم كيف وقع مع وزير خارجية السعودية وغيرها واما كيسكت على مواضيع مهمة بحال اللي وقع ليه فلقاء روما مع وزير خارجية امريكا.

كان خاص الرباط تفهم الرسالة. كان خاصها تفهم باللي امريكا راها جادة ما كتضحكش. حنا لللي درنا سلتنا كلها معاها وضاربنا مع المانيا واسبانيا ومنوضينها مع الاتحاد الاوربي٬ ما بقى لينا غير واشنطن. بعد تدوينة بليكن جات افتتاحية نيويورك تايمز اللي كتأثر فالسياسة الداخلية والخارجية الامريكية وجاو مقالات اخرى. ما تسوقناش. 

باش تقول ليك راه محاكمة الريسوني اللي ضربوه ب5 سنين ماشي عادلة راه ماشي عادلة وسالى الفيلم. ما عندك ما تقنع. داك الفيلم ديال القضاء مستقل والشي لاخر غير كولو. 

لو عندنا وزير خارجية كتهمو مصالح بلادو كثر من التصاور ديالو٬ كون لعب دور كبير وتقادت امورة كثيرة بين لقاء روما والحكم الغريب ضد سليمان الريسوني ب5 سنين. واش وصل لخبار بعدا ولمن بالضبط. واش قالها للحكومة ولرئيسو واش قالها لرئيس الدولة اولا. كيفاش دوز الرسالة؟
لان خرجة الناطق الرسمي باسم الخارجية الامريكية البارح كانت قوية. كتبين باللي امريكا كاعية. باللي فهمات ان الرباط ما استوعباتش الميساج ديال 28 بونيو فروما. 

الناطق الرسمي باسم الخارجية جاب كلمة واجدة. رسالة واضحة للرباط. طبعا فيها تهديد مبطن. حقاش ما هدرش لا على الشراكة الاستراتيجية لا على التعاون بين الدولتين. حط كلشي فالجنب وهدر فقط لا غير على الحكم على الريسوني ومحاكمة الراضي. محاكمة غير عادلة كيف قال٬ عرفات انتهاك ضمانات المحاكمة العادلة واعتابر هاد الحكم “يتعارض مع “الالتزامات المغربية بمحاكمات عادلة للأفراد المتهمين بارتكاب جرائم، ويتعارض مع وعد دستور 2011 وأجندة إصلاح جلالة الملك محمد السادس”.

مشى وزاد باللي هاد الشي خلى “مخاوف” عن الحكومة الامريكية “بشأن التأثير السلبي لهذه الحالات على حرية التعبير وحرية تأسيس الجمعيات وحرية الصحافة المغربية من أجل مجتمعات مزدهرة وآمنة ويجب على الحكومات أن تضمن للصحافيين أداء أدوارهم الأساسية بأمان دون خوف من الاعتقال الجائر أو التهديدات”.  

وسالى تصريحو بتهديد واضح للرباط صاغوه بديبلوماسية “نحن نتابع هذه القضية عن كثب وقضايا لصحفيين المحتجزين الآخرين في المغرب بمن في ذلك عمر الراضي، وقد أثرنا هذه المخاوف مع الحكومة المغربية وسنواصل القيام بذلك”. 

يعني جمعو ريوسكم. ثمن هاد الشي غادي يكون غالي بزاف. 

دابا كذوب وتصريحات امثال بوريطة ما صالحة والو. اهم حليف لينا فهاد الوقت مقلق علينا. خاص الريسوني والراضي يتحاكمو محاكمة عادلة. سالى الفيلم. ما كرهوش يخرجو