اعدها ل”كود” الاستاذ الباحث عبد اللطيف اگنوش ////
ولكن مع ذلك، أغلبية المغاربة ديال المنطقة الفرنسية بقاو متشبثين بالسلطان “المخلوع” على أساس أنه هو “السلطان الشرعي”، وعْتابرو السلطان “الجديد” مجرد “مونيكا” وجرد “سلطان فرنسيس وسلطان النصارى”، واعتابرو النفي ديال “محمد بن يوسف” جريمة في حقهوم وجريمة في حق “دينهوم”، وغالبية المدن ما حْتافلاتش بعيد الأضحى وما ذبحاتش الضحية ديالها هاذاك النهار ديال 21 غشت !!
أسبوع من بعد، وفي الوقت للي الجوامع ديال المملكة خوات من المصلين للي رفضو أنهوم يسمعو اسم “بن عرفة” في الخطبة، مجموعة ديال العيالات في مدينة سلا قالو بللي “شافو سيدنا، الماليك بن يوسف في القمر” !
هاذ “المعجزة” غادي تصبح أسطورة كاتتداول عند الناس، وأي واحد حقق في القمر، يمكن ليه يشوف محمد “الخاميس” وضايرين بيه مولاي الحسن ولالة عايشة…ومن هاذ اللحظة، صبحات “أسطورة السلطان الشرعي المنفي” مهيمنة على العقول والعواطف ديال الناس، وشججعات على ظهور ما يسمى “الإرهاب” عند السلطات الفرنسية، وما يسمى “أعمال الفداء” عند “الحركة القومية” المغربية…أسابيع قليلة من بعد النفي ديال “الخاميس”، علال بن عبد الله غادي يحاول يصففيها للسلطان “بن عرفة” وهو في طريقو للصلاة يوم الجمعة…
شارل أندريه جوليان، وللي عاين هاذ الأحداث وعاشها، كايفسسر هاذ الظاهرة ديال “الخاميس في القمر”، بأن العيالات المغربيات فذاك الوقت كانو مزعوطات في سيدي محمد بن يوسف لأنه كان زوين، وكايشوفو فيه “المثل الأعلى” ديال الراجل المغربي…
وكايزيد بللي زوجة علال بن عبد الله، حلفات لراجلها أنه مابقاش يمسسها ولا ينعس معاها، إيلى بن عرفة“سلطان النصارى” بقى سلطان على المغاربة…وكا يقول بللي ربما هاذا هو السبب للي خلى علال بن عبد الله يحاول قتل بن عرفة يوم الجمعة أثناء صلاة الجمعة، وهي العملية للي فشلات كما هو معروف…ولكن عطات للأحداث السياسية مجرى آخر ماكان حتى واحد كايتوققعو!!
الأحداث عرفات مجرى آخر بالفعل، بحيث أن “مسألة العائلة الحاكمة والسلطان الشرعي” صبحات على رأس الأولويات لحل “القضية المغربية”…وما يشبه “الحرب الأهلية” للي بدات في البلاد، جَبْراتْ فرنسا أنها تدخل في مفاوضات مع “السلطان المنفي في مدينة آنتسيرابي بمدغشقر”…الباشا لكًلاوي للي حس بأن الهيبة والجاه ديالو مشاو بحالهوم، “قْلَبْ الجلابة” وجْمعْ الصحافة يوم 25 أكتوبر 1955 وصرَحْ ليهوم: “أنا فرحان بزاف مللي شفت الشعب المغربي فرحان بخبر رْجوعْ الماليك محمد الخاميس…وراني في جنب الأمة المغربية للي ناداتْ بإرجاع سيدنا للعرش ديالو، لأن الرجوع ديالو غادي يأللفْ القلوب ويصالحها معا بعضياتها”!
في يوم 29 أكتوبر 1955، “بن عرفة” للي تفاوضات معاه فرنسا باش يتنازل على العرش مقابل فلوس كثيرة وتأمين مستقبلو ومستقبل ولادو، كتب “الالتزام ديالو بالتنازل عن العرش” وعطاه للقبطان محمد أوفقير، ثم رْسلْ برقية من طنجة لرئيس الجمهورية الفرنسية René Coty كايقول فيها: “أمام هاذ الإجماع ديال الشعب المحبوب، كانشوفو بللي من واجبنا أننا نتخللاو على جميع الحقوق ديالنا، ونقولو لجميع رعايانا أنهو يلتففو حول شخص سيدي محمد بن يوسف” !! وفي نهار 7 ديسمبر 1955، تعيينات أول حكومة مغربية ديال المغرب المستقل برئاسة “السي مبارك البكاي” أحد الشخصيات المستقلة عن الأحزاب…
وقبل ما نشوف آشنو هي الإصلاحات وآشنو هو برنامج الدولة العلوية لمغرب الاستقلال، لابد ما نتوققف شوية على مسألة كاتبان ليا مهمة لفهم التطورات السياسية للي غادي تحدث في السنوات اللولة من الاستقلال..هاذ المسألة هي: آشنو هو الوضع السياسي للعائلة العلوية معا بداية الاستقلال؟؟
