كود كازا//
تم انتخاب المحامي مراد العجوطي رئيس جديد لنادي المحامين بالمغرب، خلفا لسعيد معاش، وهذشي اليوم الأربعاء خلال الجمع العام الاستثنائي للمكتب التنفيذي لهذ الهيئة فكازا.
وفتصريحو ل”كود” قال العجوطي أن كرئيس للنادي هو تكليف كثر ما هو تشريف، وأنه كيشكر الزملاء على الثقة اللي وضعوها فيه، وكيشكل النقيب ديال هيئة المحامين فكازا على استقبالو والدعم ديالو.
وقال المحامي، اللي عندو 32 عام، أنه خلال توليه لهذ المنصب غيكون اشتغال على برنامج عمل كيهم خصوصا التصدي لمجموعة من حملات التشهير اللي كيتعرض ليها المغرب من طرف منظمات وأشخاص فالخارج، ومن بينها ممارسات لأعضاء البوليساريو فمجموعة من الدول الأوروبية، وغيتم دراستها بشكل قانوني.
كذلك “كنشتغلو على مشروع نشر الثقافة القانونية وتعزيز الكفاءات الأكاديمية للمحامين، وخلق نقاش بالنسبة للاشكاليات القانونية الآنية”، على حساب هضرة المحامي الشاب.
ونادي المحامين، اللي تأسس سنة 2012، كيهدف لتعزيز الكفاءات الأكاديمية للمحامين ونشر الثقافة القانونية وتشجيع النقاش القانوني والابتكار، بالإضافة لأنه كيعزز التواصل بين مختلف الفاعلين فمجالات القانون والأعمال والسياسة.