عفراء علوي محمدي- كود//

كشفات الجمعية المغربية لحقوق الإنسان، فرع مراكش، أن حارس عام فإعدادية اغتصب تلميذة عندها 14 لعام، الشي اللي الاسرة ديالها تتقدم بشكاية عاجلة لوكيل الملك بمراكش، مصحوبة بشهادة طبية.

وصرحات التلميذة، حسب بلاغ للجمعية، أنها تعراض للاغتصاب من طرف الحارس العام من اللور فمكتب إداري فالإعدادية، اللي كينا فمنطقة العزوزية فمراكش.

وكتقول أنها تعرضات للاغتصاب بعدما ابتزها الحارس العام على مواقع التواصل الاجتماعي، وهددها باش يشهر بيها.

وحاولات البنت، اللي كتقرا فالإعدادية نفسها، تنتحر بعد الواقعة، قبل ما يتدخلو واليديها باش يعتقوها، كيف دخلات فأزمة اكتئاب حادة شافت عليها خبير نفسي، وواليديها خايفين لا تكرر محاولة الانتحار.

وطالبات الجمعية من من الوكيل العام للملك، والوكيل العام لدى محكمة الاسئناف مراكش، باش يعمقو البحث فالقضية، ويفتحو تحقيق دقيق فالواقعة باش يكشفو على حقيقة مزاعم الاغتصاب، مع ترتيب الجزاءات القانونية اللازمة، حرصا على حماية المصلحة الفضلى للطفل، وتحصينا للمجتمع من ظاهرة العنف الجنسي ضد القاصرين.