وكالات //

عتق واحد الراجل شينوي، بنت صغيرة، طاحت من شرجم دارهم فالسانكيام إيطاج، وقدر يشدها قبل ما تضرب مع الأرض.

هادشي وقع فمنطقة “Tongxiang” التابعة لإقليم “Zhejiang” فالشينوا.

وكيبين فيديو اللي وثق لهاد الحادثة البنت اللي فعمرها  عامين، طاحت من دارهم، على واحد البانو ديال الإشهار، ومن بعد كانت غاديا طايحة للأرض قبل ما يعتقها السيد اللي كان واقف التحت.

Thankfully, he caught her just in time. pic.twitter.com/PCuopk7ZXd

— South China Morning Post (@SCMPNews) July 22, 2022

هاد الراجل اللي سميتو “Shen Dong”، خدام فبنكة قريبة من البلاصة اللي وقع فيها هادشي، سمع الصوت ديال الطيحة اللولة وكان كيحاول يعيط للسلطات، لكن البنت زلقات من فوق البانو ولاح هو التيليفون من يدو وقدر يشدها قبل ما تصاطح مع الأرض.

البنت الصغيرة تعتقات من الموت، لكنها توعتات فرجليها والرية ديالها، وحالتها دابا مستقرة.