كريم الصوفي – كود//
[email protected]
ذكرت تقارير كاطالونية، أن المدرب الجديد ديال البارصا “تشافي هيرنانديز” عطا الموافقة ديالو لإدارة الفريق الكطالوني لانتداب اللاعب المغربي حكيم زياش اللي كيلعب دابا للنادي اللندني تشيلسي.
وأضافت التقرير ذاتها، أن اللاعب المغربي الدولي حكيم زياش قد يصل إلى برشلونة خلال الميركاتو المقبل، بعد اقتناع المدرب تشافي، أن طريقة لعب زياش كتناسب بشكل كبير مع الطاكتيك ديالو ومع المشروع ديال برشلونة وتشافي، خاصة وأن اللاعب المغربي كيقلب على تغيير الأجواء بعيد على تشيلسي بسباب عدم الاعتماد عليه أساسي وعدم لعبه مباريات كثيرة في الدوري الأنجليزي.
زياش اللي كيلعب ف خط الوسط الهجومي كيبلغ من العمر 28 عاما ودابا ف ذروة المسيرة الاحترافية ديالو، وكيميل للعب ف الجهة اليمنى، وهاذ الشي على حسب التقارير ذاتها، هو اللي كيحتاجو تشافي ف الطاكتيك ديالو بسبب الاصابات المتكررة اللي كيتعرض ليها ديمبيلي ووجود لاعبين شباب غير مجربين ومكيقدروش يلعبو ف العمق وزياش عندو مع اللمسة الأولى والتسديد وكيتحرك مزيان ف التيران، إضافة إلى التمريرة الأخيرة اللي كتحتاجها البارصا ف الوقت الحالي.
ودفع نادي تشيلسي مبلغ 40 مليون يورو من أجل انتداب حكيم زياش قبل موسمين، ولم تنخفض قيمته السوقية، ودابا البارصا الا بغاتو خاصها تدفع 28 مليون يورو، خاصة وأن البارصا ابتداءا من يناير الجاي، غادي تكون مستعدة باش تدير تغييرات ضمن مشروعها بشكل يسمح بانتداب لاعبين جداد
