كريم الشركي-كود///

كارلوس باتريشيو، الاسباني  البالغ من العمر 52 سنة، اللي قتل المغربي يونس 39 عام، قتلوا بدم بارد بسباب الكراهية ضد الاجانب لي سبابها تجييش الاعلام الاسباني على المغاربة.

كارلوس كان فواحد الكلوب ف ماثارون شرب فيه بيرتو، ومشى لكافيتيريا مويل لي غايلقى فيها يونس، وغايدخل معاه فجدال بعدما بدا كيقول ان المغاربة كاملين ماخاصهومش يبقاو فإسبانيا، الجدال كان غايرجع مدابزة ولكن تدخلو الاصدقاء ووقفو هادشي.

وحسب صحيفة لابيرداد، فكارلوس مشى لدارو بدل حوايجو وهز الفردي ديالو ورجع للكافيتيريا ضرب قرطاسة فالسما، وثلاثة فصدر يونس، هادشي دار الرعب وخلا الناس يهربو، بينما سجلاتو هو الكاميرات خارج بشكل عادي.

بعدها او كيلاحقوه البوليس والحرس المدني وهو يهرب للبحر باش مايشدوهش وملي تبعو احد العناصر كان باغي يقتلوا تا هو،  ولكن عنصر الامن قدر يحيدلو الفردي ويعتاقلو.