كود مدريد ///
زادت وزيرة الخارجية الاسبانية ارانشا گونزاليث لايا صباح هاد لاربعا موقف بلادها من قضية الصحرا. اكدات باللي موقف مدريد من هاد القضية “ثابت. ما كيتغيرش وما غاديش يتغير”. الوزيرة ضافت “راه موقف كيقوم علي “تعددية الاطراف والاحترام والقوانين الدولية والقرارت الاممية”.
الحزب الشعبي المعارض وبيلدو٬ الحزب الباسكي٬ فمجلس النواب الاسباني هما اللي استدعاو الوزيرة للبرلمان اليوم لاربعا باش تجاوب على قضية الازمة مع المغرب. الوزيرة قالت باللي كلشي هاد الشي اللي وقع مع الرباط داير على موقف الحكومة من الصحرا.
لايا گونزاليث قالت باللي هاد الموقف ماشي ديال الحكومة ولكن ديال الدولة الاسبانية هادي سنوات وباللي هاد الاحزاب اللي كتسولها اليوم موافقة عليه، واضافت “خاص الاحزاب تدعم الحكومة وتسهل خدمتها فالامم المتحدة او الاتحاد الاوربي باش يتم التوصل الى “حل سياسي يراعي القانون الدولي والقرارات الاممية” وهاد الشي اللي غاديين نمشيو فيه٬ تشدد الوزيرة.
موقف الوزيرة الاسبانية للي تسبات فالازمة مع الرباط٬ غادي يعمق هاد الازمة.
