كود الرباط//

ها ما گلنا

ها اللي كنا كانتوقعوه من شحاااال هادي وحتى شي واحد ما كايسمع لينا ولا كايعطينا وقت

ها اللي كنا خايفين منو وكنغوتو عليه، ولكن معامن

تران تقلب بالناس فبوقنادل و الناس ماتو، وكاين بزاف ديال الجرحى

هادشي راه كان بااااين باللي جاي وغادي نوصلو ليه، غير كنا دايرين عاين ميكا

ومع الأسف جا هاد النهار

هادشي اللي وقع راه نتيجة طبيعية لطريقة تسيير وتدبير وخدمة هاد الشركة اللي ما كاتحتارمش بنادم وكاتعامل معاه كل نهار بحال شي حيوان مشارجينو فكاميو

وكاع الناس اللي كايديرو لا نافيط كل نهار مع هاد الشركة راهم عارفييني علاش كاندوي…

كاع الناس اللي كايوصلو فالصباح معطلين لخداميهم… عارفيني علاش كاندوي

كاع الناس اللي كايساليو خداميهم عياانين فلعشية باغيين غير يدخلو لديورهم يشوفو وليداتهم ويحطو راسهم فالمخدة وينعسو، وكايدخلو للمحطة باش يلقاو التران داير روطار ديال ساعة وساعتين بلا حشمة وبلا ما يعرفو آشنو واقع…عارفييني علاش كاندوي

كاع الناس اللي كايتعامل معاهم سيكيريتي فالباب ديال المحطة بحالا جايين طالبينو وهو معفر وكايغوت عليهم وكايسحاب راسو بوليسي وحنا شفارا… عارفيني علاش كاندوي

كاع الناس اللي كايطلعو فهاداك الطارو ديال الزبل اللي مسمينو ظلما تران وكايبقاو سادين نيوفهم حتى يوصلو بريحة لخنز وريحة لخرا (حشاكوم) اللي خارجة من الطواليط راهم… عارفيني علاش كاندوي

كاع الناس اللي مشات عليهم الطيارة بسباب التأخر ديال القطار من دون مبرر، وفاش كايجيو يدويو ماكايلقاوش معامن… عارفيني علاش كاندوي

كاع هادوك لوليدات اللي عاندهم امتحان وضيعوه بسباب روطار ديال التران وفالللخر كايگولو ليهم ماعاندنا ما نديرو ليكم، ديك الساعة ما تركبوش فيه وسيرو فطاكسي… عارفيني علاش كاندوي

كاع الناس اللي كايوصلو معطلين ويمشيو يقطعو ورقة ديال التران وكايلقاو الصف طوييييييل حينت هاداك المسؤول على التذاكر نايض من بلاصتو ولا كايهضر فالتيليفون ولا كايتمزكك وما مسوقش ليك نتا گاع… راهم عارفيني علاش كاندوي

گاع الناس اللي كايجيو يصايبو لاكارط ديال التران وكايلقاوهم زادو فيها بلا ما يعلمو بلا ما يحسنو فالخدمات…عارفيني علاش كاندوي

گاع الناس اللي كايجيو يصايبو لاكارط ديال التران وكايكولو ليهم رجع ليها من هنا 48 ساعة حينت لامبريمونت خاسرة… عارفيني علاش كاندوي

گاع الناس اللي مضطرين كل صباح يصبحو على كونطرولات دايرين فيها باللي تران ديال باهم، مغوبشين، قلالين الآداب، ما كاتتوفرش فأغلبهم أبسط الشروط المهنية، وكايجي يخرج فيك مرضو وخراه بحالا انت اللي فايقتيه باش يجي يخدم… عارفيني علاش كاندوي

گاع الناس اللي خرجو من ديورهم فرحانين فالأعياد، غادين يشوفو العائلة ويفرحو معاهم وهجراتو ليهم الشركة نهار العيد بشي روطار خياااالي نكد عليهم حياتهم ووصلهم معصبين بلاصت ما يكونو فرحانين… عارفيني علاش كاندوي

گاع الناس اللي ولاو كايفضلو يمشيو فطاكسي ولا طوبليس ولا كار، على أنهم يخنزو حوايجهم ويتعطلو فالتران…عارفيني علاش كاندوي

گاع الناس ذوي الإحتياجات الخاصة اللي ما عندهمش كيفاش يركبو فتران حينت بين الباب منين غادي يطلعو والرصيف جوج متر. ويلا يلا ما جاش شي واحد هزهم بقاو تما… عارفيني علاش كاندوي

گاع الناس اللي ولاو كايفكرو يديميسيونيو من خداميهم ويخدمو ولو بصالير أقل غير على قبل باش ما يبقاش يتبهدل فالتران كل يوم… عارفيني علاش كاندوي

گاع الناس اللي كايخلصو دم جوفهم فلاكارط وكيحسو باللي غير كايلوحو فلوسهم فلخلا… عارفيني علاش كاندوي

گاع الناس اللي سمعو هاد الجملة الشهيرة :  تشفرو لينا سلوكا ديال الضو داكشي علاش تران ما غايجيش وطلعت ليهم فكرهم… عارفيني علاش كاندوي

گاع الناس اللي غير كايشوفو شتا بدات كاتصب كايكحلو بلعما وكايعرفو أن السسك غادا تفيض والترانات غادين يوقفو… عارفيني علاش كاندوي

گاع هادوك مساكن اللي كايركبو فترانات مراكش وسيدي قاسم وغيرهم من ترانات الموت، وكايوقف بيهم وسط لخلا فالظلام وماكايعرفوش باش تبلاو وكايوليو خايفين لا يجي شي حد يتكرفص عليهم فهاداك لخلا… عارفيني علاش كاندوي

كاع الناس اللي حضرو للعافية شعلات فالتران وبلاصت ماتجي لبومبية سدو عليهم البيبان وخلاوهم تما… عارفيني علاش كاندوي

كاع الناس اللي فاش كاتكون الشتا خيط من السما والتران واقف عاد كايجيه يسد على الناس الباب ويخليهم واقفين مسرسطين برا فواحد المشهد سادي غريب ومقزز… عارفيني علاش كاندوي

كاع الناس اللي كايكون عندو غرض وكايدير منو بناقص غير باش مايطلعش ويشوف كمارت التران… عارفيني علاش كاندوي

كاع الناس اللي كايبقاو يتسناو فالتران ساعة، ومن بعد ما كايجي وكايركبو فيه كايبقاو يتسناو ساعة آخرى قبل ما يقولو ليهم : هاد التران ما غاديش حتى هو نزلو سيرو فلاخر… عارفيني علاش كاندوي

كاع الناس اللي كايتلقاو بلگور راكبين معاهم فالتران وكايشوفو فعينيهم نظرات الشفقة والاستغراب وكايبقى فيهم لحال على ريوسهم وعلى هاد لبلاد… عارفيني علاش كاندوي

لكاع الناس اللي كايقراو، عااااارفين أن واخا هاد الكارثة والناس ماتو ولوليدات تيتمو ما غادي يوقع وااااالو، وسيبقى الحال على ما هو عليه، وغايبقى الروطار، وغايبقى لوسخ، وغايبقى لخنز، وغايبقى التخنزير، غادا تبقى اللا مبالاة، وغايبقى الثمن غالي مقارنة بالخدمة، وغادين يبقاو كايدوي على TGV واللي فشي پوسط غادي يبقى فيه… وحنا لينا الله