محمد سقراط-كود///

لبارح كنت في واحد الرحلة شاقة ومهمة صعبة لي كنت متخايل أنها ساهلة بحكم عدد الإشهارات ديال شركات الإرساليات حاليا في الفايس أو التلفازة أو الراديو، حتى كتلي تخايل رتسك غادي نافسو علي اكسبريس ن غدا، ولكن للأسف من بعد دورة على العديد من الشركات تبين اننا غادي نافسو البعابع داكشي متخلف وقديم وغالي وتقيل وغير منطقي بتاتا، كانى خاصني نسيفط بزطام ديال الجلد خفيف صغير لمدينة قريبة درتو فواحد الكريطينة صغيرة وأنيقة كانو وصلوني فيها شي لعيبات من علي اكسبريس، التغليف قوي ومزوين ونقي ومخير ولكن فاش خديتو لشركة اللولة والتانية والتالتة قالوليا خاصني نديرو في كرطونة ما كبر ونزيد معاه شي جوج خنشات ديال الملحة باش يفوت كيلو في الوزن عاد يمكن يسيفطوه وبشحال هادشي بخمسة وربعين درهم ونص ساعة ديال الخدمة، خاص تدوز عند شي حانوت يعطيك شي كرطونة ديال بيمو خاوية وتحط فيها داك البزطام وتقلو بحجرة أو الملحة وتشوه مو وتردو بحال الى مشري من بركاصة عاد تدوزو للشركة وتخلص عليه خمسة وربعين درهم وكثر في بلايص خرى باش أمانة تبقى على خاطرها حيت مانعة على شركات الإرساليات الأخرى ينقلو شي حاجة فيها قل من كيلو.

دابا تخايل معايا موطور شينوا ديال ليفرور يقدر يهز في صنيديقة صغيرة حتى ل 200 بزطام، ولكن فاش كل بزطام تديرو في كرطونة كبيرة وتقلو بالملحة باش يوصل كيلو داك الساعة الموطور غادي يهز عشرة دالبياسات الى كثر، وخاصو يمشي يفرق ويرجع للديبو كل ساعة، مكاينش الفعالية نهائيا، عوض الدولة تسهل على المغاربة يبيعو ويشريو في الأنترنيت هي دايرة ليهم كاع العراقيل ديال الكون في طريقهم، مسمار ديال درهم يمكن نشريه من علي اكسبريس ويوصلني حتى للدار في عشرين يوم نصها كيدوزها غير في المغرب كيدور من ادارة لإدارة، بينما فاش كتشوف منين داز داك المسمار كتلقاه كيدوز نهار في الدولة مكيفوتوش ويعاود يشد الطريق، هاهو داز لأوزباكستان من بعد بلجيكا من بعد الصبليون هادشي كيدوز منو طيارة، غير كتبان راه وصل لبلد الوجهة هنا كتبقى عاصر كتسنى، كاين الحاجة لي بقات شهر في كازا من بعد يوماين ولا تلتيام في فاس عاد كتوصلك، ولكن الأهم هو أنها كتوصل في تغليف صغير وخفيف وعملي.

دابا مثلا صانع تقليدي بغى حتى هو يروج سلعتو في الأنترنيت غير فايسبوك ماركت، كيبيع فيه بزيطمات وتويشيات، عندو بياسات ديال عشرين درهم وتلاتين وحتى لمية كاع، خاصو يبيع بياسة بعشرين درهم ويسيفطها للكليان ب 45وعاد يغلفها ويمشي حتى لعندهم يحطها، وا لحماق هذا فيناهو هاد التشجيع، وكاين موشكيل آخر وهو الفلوس لي باغي يبيع سلعتو في الأنترنيت ويتخلص من بعد ماتوصل السلعة خاص يدخل براس لمال ديال وارن بافيت، حيت الى كان راس مالو قليل غادي يبقى محبوس عند شركة الإرساليات لشهور عاد يشد رزقو، يعني يقاد السلعة يسيفطها ويريح يتسنى فلوسها راس لمال بالربح شهورة عاد يشدهم باش يقدر يخدم عاوتاني، راه موشكيلة حقيقية هادي، الى كان قادر تاجر أو صانع شينوي في أدغال نانجينغ يسيفط ليك المنتوج ديالو حتى لباب الدار بمقابل رمزي وفي العديد من الأحيان فابور، وفي المقابل التاجر أو الصانع المغربي الى بفا يسيفط المنتوج ديالو لمدينة قريبة ليه بجوج ساعات ديال الطريق خاصو كثر من ثمن السلعة غير في الإرسال عاد التعنكيش ديال التغليف ويتسنى الفلوس قرن وزمارة، الى باغين تقطعو البيع والشرا مع برا وعلى الأقل سهلوه بين لمغاربة بيناتهم ماشي تقطعوا كاع الأرزاق .