كود هناء ابو علي ///

ناصر بوريطة وزير الخارجية والتعاون ما كيكرهش غير لعيالات اللي فيديهم وعندهم شخصية كيكره حتى الحياة. كيكرهها حقاش كيكره السينما. البارح وزير الثقافة والشباب والرياضة عين اعضاء لجنة دعم إنتاج الأعمال السينمائية.

فهاد اللجنة فيها وجوه كانت فهاد اللجان وفيها اسماء لا تستحق تكون كاع. اللي مثير فهاد الشي كولو واللي جا فبيان المركز السينمائي المغربي وكذوب وزفوط هو تقديم نجلاء بنمبارك كاعلامية ومهتمة بالسينما.

كذوب حقاش ماشي اعلامية دابا. هي جابها ناصر بوريطة ودخلها الخارجية وعطاها ملفات ورسلها للندن باش تقدر دوز الكونكور ديال مديريات فالخارجية وهاد الشي ما كان وتعينات مديرة لمديرية الدبلوماسية العامة والفاعلين غير الحكوميين بوزارة الخارجية.

ومهتمة بالسينما طبعا كذوب حقاش ما عمرها كانت مهتمة بالفن السابع.

طبعا كلشي وجد ليه بوريطة كاره لعيالات اللي عندهم شخصيات. دابا فالتعيين فلجنة الدعم راها داخلة ممثلة للخارجية وهما كيديرو لقوالب بهاد “اعلامية ومهتمة بالسينما”.

لجنة الدعم اللي غادية ترأسها الكاتبة غيثة الخياط فيها شي اسماء اخرى ما عندها علاقة بالسينما وفيها ناس عندهم احترام بحال موليم لعروسي.

المهم لجنة ضعيفة فعمومها واختيار بنمبارك شوهة ليها.