هناء ابو علي  كازا//

ديما كان عندنا موقف مع اسلوب ناصر بوريطة وزير الخارجية والتعاون. طريقتو كتبين باللي هادا ماشي ديبلوماسي. هادا تقنوقراطي كيحفظ كلشي وكيجي يعاودو. تسولو على الصحرا يعطيك كاع الاتفاقيات اللي توقعات وفين توقعات ووو يعني ارقام وتواريخ جافة ناقصها الانسان. ولا سولتيه على ناس الصحرا وقبايلها وجغرافيتها وفنونها واكلها ما يعرف والو.

بوريطة باش وصل للوزارة وصل وعندو عقد كثيرة. وصل بعد ما هز الشكارة ديال الطيب الفاسي الفهري باش كان وزير الخارجية. وصل وهو حاس براسو مهان مبعد باش كان كاتب عام ايام بنعرفة وبعدو مزوار. وصل وناس الوزارة كيعرفو معدنو مزيان. كيعرفو شخصيتو مزيان.

عارفين كلنا باللي المراسلة اللي تسربات البارح للصحافة واللي فيها كيأمر وزير الخارجية من الشاف ديالو فالحكومة٬ بنعرفة باش يعلقو كاع انواع التواصل والتعاون مع السفارة الالمانية يستحيل يديرها. حقاش الديبلوماسية مجال حصري لرئيس الدولة. غير باش يكون عندك وزير خارجية ديبلوماسي ماشي وصولي تقنوقراطي٬ كيكون عندو رأي. باش كتوصلو رسالة فيها حدة كيطبعها بطابعو الديبلوماسي الخاص. قبل هاد الشي كيقتارح. مثلا البارح كان يكتب ويقول باللي موضوع بحال هادا من الاحسن توقعو الحكومة ايلى ما بغاش رئيسها هو اللي يوقعو. كان يغير الاسلوب الاستعلائي لاسلوب ديبلوماسي يفي بالغرض.

النتيجة هاد الديبلوماسية المندفعة راه المغرب هو الخاسر فيها. راه قطعنا علاقات ديبلوماسية مع دول ولكن كان البيان كلاص مكتوب برزانة ماشي بغباء.

بوريطة فبيانو غير زاد شعل العافية فحكومة كيعيش رئيسها مشاكل كثيرة وماشي هادي وقيتة تزيدو مشاكل اخرى. راه الدولة براسها محتاجة لحزب العدالة والتنمية باش دوز قوانين. ايلى كان هدف بوريطة اهانة بنعرفة راه هاد الشي غادي يعطي نتائج عكسية. ايلى كان غباء منو راه هاد الشي اخطر. دولة بحال المغرب خاصها ديبلوماسي كيفهم تاريخ هاد لبلاد. ماشي واحد كيردد بحال الببغاء معطيات بدون روح.

باش تعرفو شخصيتو مزيان شوفو شكون مدور بيه وعلاش جاب بزاف منهم من برا اللي ما عارفينش تاريخو. كيفاش دار واحد كان كيطيب ليه السباگيتي فمندوب المغرب فالاتحاد الافريقي وشوفو علاش رفض لحد الان تلتحق الكاتبة العامة لوزارة الخارجية مونية بوستة بمنصبها. علاش ما خبرش القصر بحالتها.

هاد الوزير بتصرفاتو الطاىشة ببياناتو المنفعلة باسلوبو الاستعلائي كيضر لبلاد ماشي كينفعها. لبلاد محتاجة لوزير خارجية بشخصية مثقف وقاري وعندو شخصية ماشي ببغاء