أخنوش لوهبي: برافو درتي خدمة كبيرة فوزارة العدل بتحديث المنظومة القانونية والقانون الجنائي قريب نصادقو عليه
هناء ابو علي الرباط ///
عشاق الوزير المتناقض كاره النساء ناصر بوريطة فرحانين بيه. فرحانين بتصريحاتو. البارح خرج فاذاعة “اورب 1” وقناة “ال سي اي”. تصريحات متناقضة مع تصريحاتو لوكالة الانباء الاسبانية ايفي قبل 3 ايام.
بوريطة كان قال فتفسيرو فخروج 8 الاف مغربي ومغربية منهم شي الف و500 قاصر وفيهم حتى الاطفال والرضع من كاستييخو لسبتة٬ باللي كان تراخي فالقوات الاسبانية اللي حملها جزء من المسؤولية. لكن فنفس التصريح هاجم بطريقة غير مفهومة الامن المغربي، واخا هو عارف باللي ما كاينش غير لبوليس فالمنطقة الحدودية. قال باللي عياو بسباب الجهد اللي داروه ومع نهاية رمضان.
تفسير غبي طبعا حمل فيه المسؤولية لجهاز بعينو.
لكن البارح ففرانسا عاود نفس التبريرات فحواراتو. حتى الطريقة ما قدرش يبدلها. قال باللي “اليوم كاين مشكل ثقة ومشكلة احترام متبادل مع اسبانيا” وباللي هي اللي خاصها تلقي حل في اشارة الى قضية دخول ابراهيم غالي زعيم البوليساريو بجواز سفر ديبلوماسي جزائري وهوية مزورة بلا اخبار الرباط. فحالة الي ما لقاتش حل او رجع فحالو بوريطة واضح “غاديين نمشيو للقطيعة”
واكد باللي ان الرباط ماشي من واجبو يحمي اوربا. ولا كان كيديرها راه فاطار الشراكة وبين الشركاء كتكون علاقات متبادلة مبنية على التفاهم وفق مصالح كل طرف. تبرير ما عندو علاقة بالتبرير السابق. ما بقاش البوليس ديالنا عيى ولى هادي سياسة عندنا. نبغيو نحضيو حدودنا او نرفضو هادي عندها علاقة بطبيعة تعامل الدولة اللي على حدودنا معانا.
وهنا خرج نفس الارقام فتصريحو ل”اوروب 1″ عاود رددهم كببغاء لقناة “ال سي اي”. ذكر ان المغرب يوظف 20 الف باش يحمي حدود اوربا وانو فكك 8 الاف خلية للاتجار بالبشر ووقف 14 الف محاولة للهجرة السرية منها 80 محاولة المرور الى سبتة وان هاد البلاد تبادلات مع اسبانيا اكثر من 9 الاف معلومة خاصة بالهجرة
هاد الاسلوب فيعاود نفس المعلومات بنفس الطريقة لاكثر من وسيلة اعلام كتسيء للمغرب. كيفاش عندنا وزير خارجية عندو فقر فاستعمال اساليب متعددة لتوضيح رسالة المغرب. كل وسيلة ورسالتها.
النقطة اللي ما بغاش يجاوب عليها بوريطة ومهمة وهي علاش خرجو اطفال وقاصرين. دوك الصور المهينة لينا اللي استغلوهم مزيان فالغرب. صور ساءت للمغربي. ساءت لكاع مشاريع التنمية اللي دارت فالمغرب. هنا بوريطة ما قال والو. ما قالش حقاش ناقصو الذكاء باش يقدر يتعامل مع اسئلة بحال هاكا. مولف كيوجد نقطو ويبدا يعرضهم.