كود سعيد الشاوي الرباط ///

اليوم وزيرنا في الخارحية والتعاون ناصر بوريطة اللي عندو عقد كثيرة بسباب مسارو بالاضافة الى عقدة لمرا اللي ما قدرتش يتخلص منها. عقدة لمرا اللي باش دخل للخارجية تزوج بسيدة غير باش يطلع شوية فالگراط وغير سالى منها تفارق معاها. كيكره النساء القافزات المستقلات اللي عندهم شخصية

هاد لوزير اللي داير بحال الببغاء عزيز عليه لعراضة اليوم دوز اللي دار كولشي باش تولي مديرة الديبلوماسية العامة والفاعلين الحكوميين. جابها من خارج الخارجية. يتعلق الامر بالصحافية السابقة فدوزيم وقبلها “ماروك ايبدو” نجلاء بنمبارك.

بوريطة دخلها بعد وساطة من نزار بركة اللي كانت مكلفة بالتواصل عندو بالمجلس الاقتصادي والاجتماعي والبيئي والباطرونا ومشات للندن. من بعد كانت مباراة باش يعوض بيها شفيقة الهبطي اللي كان جرا عليها حقاش بحقارة يرفض كل واحد يرد عليه على شي ملاحظة٬ وتقدمو ناش من الخارجية ومدير لاماب بواشنطن السابق فؤاد عريف

واخا دار الكونكور هادي مرة ما علنوش على الاسم الا اليوم. كان اعتراض ولا رفض. ما فراسناش.

والكونكور راه غير شكلي فاللول والاخير راه بوريطة هو اللي يختار. هو اللي كيدير كلشي.

بوريطة بهاد التعيين كيضحك ماشي غير على ولاد الخارجية بل على لمغاربة كاملين. الوزير الحاقد على لمرا باغي يعطي صورة اخرى عليه. هاد لوزير اللي دا معاه مرا لبروكسيل ما عندها صفة وعاود داها لنيويورك وعطاها البادج ديال المنصب الرسمي٬ اليوم بغى يقول راه كيحتارم المرا.

وفق ما علمته “كود” فاولاد الخارجية وبناتها حاقدين على هاد لوزير اللي لبس كسوة كبر من حجمو.

دابا جاب اللي كتسمع الهدرة ديالو. اللي يمكن تختار ليه لون اللبسة ماشي العبارة اللي تقدر توظف فبيان رسمي.