كود مصطفى الشاذلي ////

أكد محمد بودريقة، رئيس الرجاء الرياضي، أنه وجد برنامج باش اترشح للرئاسة ديال الرجاء، ولكن هاد البرنامج مغاديش اعلن عليه دابا، حتى اقوليهم حسبان أنا غادي فحالي، ودير إعلان في الموقع الرسمي أنه باغي ادير جمع عام استثنائي.

بودريقة أكد للمنخرطين في الاجتماع لدارو معاهم البارح أن عندو حلول آنية لأزمة الرجاء، ونسى أنه هو المتسبب فهاد الأزمة، ولو كانت بالفعل عندو حلول كان اطبقها وميخليش الرجاء في أزمة خانقة، وفالمشاكل مع الفنادق، والجامعة، والفيفا.

وبغا ابين بودريقة على حسن النية ديالو مع حسبان، وطلب من المنخرطين أنهم اشكلوا لجنة فيها أربعة منخرطين باش امشيو اهضروا مع حسبان وقنعوه باش ادير جمع عام استثنائي، لانتخاب رئيس جديد.

ولقاو المنخرطين في لاجتماع ديالهم البارج إشكال قانوني في الطريقة إلى بغاو اديرو جمع عام استثنائي باش اجريو على حسبان، لأن القانون كيعطيه الحق هو كرئيس باش ادعي للجمع لعام العادي والاستثنائي.

ودابا المنخرطين غادي اتسناو أشنو غادي ادير حسبان مع المنخرطين لغادي اجلسوا اتفاوضوا معاه وإلى رفض غادي اقلبوا ليهم على طريقة أخرى باش اجريو عليه.