كود هناء ابو علي /////

هاد الشي اللي كنعيشوه فالمغرب من عبث سبابو عبد الاله بنكيران الامين العام لحزب العدالة والتنمية. هو سباب كل المأسي اللي كنعيشوها. اقتصادية واجتماعية وسياسية وحتى ثقافية ما لها علاقة بالحريات. بلا بنكيران كنا غادين نكونو فمصاف كوريا الجنوبية وتركيا… بنكيران حكم 5 سنين =ماشي شي حكم ولكن كان فرئاسة الحكومة= ولكن طمع وبغى يزيد.

وقاحتو بدات باش ربح الانتخابات البلدية وهيمن حزبو على جميع المدن ف2016. عطاوه انذار وحذرو ولد زروال فكازا وجابو الفقها والعلما والمقدمين والشيوخ وناس البام واحزاب اخرى وما بغاش يحشم. فالانتخابات نبهوه لمقدمين ودارو حملة ولكن ما فهمتش. بدات الحملة وجمع عليه الناس بزاف وكان خاصو يتستر. تقدم للانتخابات فسلا وقدم جميع وزراؤو وهاد الشي راه تحدي للمشاعر الرهيفة للسياسيين

ربح الانتخابات وما كانش عليه ياخد رئاسة الحكومة وحلف ما يتعاتق. النتيجة تعين وخلاوه معلق في اكثر المشاهد عبثية في تاريخ حياتنا السياسية. تصور تعين رئيس حكومة ويفيق يلقى الاحزاب كتبدل وما عندوش مع من يتحالف.

كالو ليه غير البرنامج ودخل ادريس لشكر حقاش بغاتو اللحظة التاريخية ورفض.

السيد زاد فيه بزاف حتى صحابو باعوه. باعوه رخيص وتخلاو عليه وجا ابن عرفة. غير هاد المجية كانت غير مرحلة. حقاش دابا هاد الحزب خاصو يخلص على تحديه للمقدمين والشيوخ وربح الانتخابات. شفتو هاد الرباح شحال خلص فيه المغرب. ضحكو معاه وفالاخير طلع هاد الشي بحال شي كاميرا خفية