كود احمد الطيب الرباط ///
عبد الاله بنكيران الامين العام لحزب العدالة والتنمية بغى يضرب ادريس لشكر الكاتب الاول لحزب الاتحاد الاشتراكي الساعة هجومو غادي يعطي اثر عكسي. غادي يقويه. البارح اول نهار ف2022 فلقاء تواصلي مع الكتاب الاقليميين فلقاء فيه الحضوري وعن بعد، هاجم الامين العام للبي جي دي لشگر.
يسميه ما يسميهش باين كيهدر عليه. كان بنكيران كيهدر على كبوة حزبو فالانتخابات وداز للشكر. قال لناسو ايلى ما قاديناش ريوسنا٬ راكم كنشوفو “حزب فين وصل”. ثم وصل كاتبو الاول بالبلطجي اللي كيدير ما بغى وكيتسول منصب وزراي وما كيلقاهش.
وذكر بنكيران باللي باش لشكر جا عندو ايام فشلو فتشكيل حكومتو عقب انتخابات 2016 واقترح على حزب الوردة 3 مناصب وزارية٬ واضاف انو شي حد “لوح ليه بمنفعة اخرى مع جهة مدعومة او هاكدا خيل اليه” واعتبر هاد التصرف “غدر” وقال زعيم المصباح “غدرني هاداك الغدار”انسان غدار وشتيمة فحق هاداك الحزب”.
وخاطب ناس المصباح “ايلى بغيتو حزبكم يوصل لهاد الشي اللي وصل ليه الاتحاد٬ قولو لي آ السي عبد الاله هاد الباب”.
هاد المعيور وهاد الهجوم اللي ما كانش عندو مبرر سوى تصفية حسابات٬ كادو واعر للشكر. هاد الاخير كيقلب على كاع الاوراق باش يقوي ترشيحو لولاية جديدة لقيادة الاتحاد. باش يجي خصم سياسي بحال الاسلاميين ويهاجمو راه كيعني دعم كبير ليه.
حتى منافسو لشكر تحطو فموقف خايب بزاف. خاصهم يخرجو يدعمو كاتبهم الاول اليوم ومنافسهم علي كرسي الكتابة الاولى غدا.
واش كان واعي بنكيران بهاد الهدية الواعرة ولا غير داتو الحماسة؟ كيبان اللي خطأ فالتاكتيك دارو بهاد الهجوم فهاد التوقيت.
