كود الرباط ////

من النهار الاول قبلتي تلعب دور بنعرفة علاش اليوم مخرج عينيك. راه مضحك عليك الناس وصافي. رئيس الحكومة اللي خدا منصب بلا ما يستاحقو واللي كان لعبة فيد السلطة باش يضحكيو بعبد الاله بنكيران جاي اليوم يبكي. كتب تدوينة غبية جدا. فيها “هناك من يمارس البلطجة في الجماعات المحلية من قبيل منع أقلية المجلس الجماعي بالرباط من عقد دورته، وعلى السلطات المعنية القيام بدورها وتطبيق القانون”.

هذا اللي كتبها هو رئيس الجهاز التنفيذي في الدولة. اي انه رئيس السلطة اللي كيقول معنية في اشارة الى وزير الداخلية عبد الوافي لفتيت. هنا لبكا ما نافع والو. اولا كتبين باللي بنعرفة اسم على مسمى فهاد الحكومة وثانيا كيستنجد بوزير داخلية اللي عارفو كثر من غيرو انو تفرض عليه بعد ما دوز على حزبو اللي ما دوزو حتي شي والي فالمغرب.

كيفاش تقبل بلفتيت فحكومتك كون عندك شخصية ديال بصاح واليوم كتطلب منو هو يدخل ليك.

هو عارف ان هاد الشي ما شادش. يالله بدا يعيق وباغي يطبق سياسة بنكيران. اللي كان كيضرب غير هو كيعرف وقتاش وكان كيوجه الرسائل وكيعرف وقتاش. بنعرفة جابوه لمهمة كيديرها ما عندو علاش يتشكى ولا يبكي ولا يتباكى.