كود كازا//

قرر عامل عمالة مقاطعة الدار البيضاء أنفا، اليوم الأربعاء، منع الوقفة الاحتجاجية اللي كان من المقرر تدار غدا الخميس 21 يناير من طرف نقابة أرباب الحمامات والرشاشات العمومية فكازا، قدام مقر ولاية كازا سطات.

وحسب قرار للعمالة، فعدم الامتثال لهذ القرار غيعرض المخالفين للعقوبات الجري بها العمل، كيف طلب العامل من البوليس والقوات المساعدة ينفذو هذ القرار.

وهذ القرار، اللي كتوفر ” كود” على نسخة منو، جا بناء على بلاغ الحكومة اللي مدد حالة طوارئ صحية لأسبوعين، وبناء على مرسوم قانون المتعلق بسن أحكام خاصة بحالة الطوارئ الصحية والمرسوم المتعلق بإعلان حالة الطوارئ الصحية، اللي كيمنعو جميع أشكال التجمعات نظرا للظروف الوبائية اللي كتعرفها البلاد.

وهذ القرار جا كذلك، تفاديا للعوامل اللي من شأنها المس بالتدابير الوقائية لمنع انتشار وباء كوفيد 19، والحفاظ على النظام العام الصحي.

وسبق لرئيس جامعة ارباب الحمامات صرح ل”كود” أن الجامعة ضد هذ الوقفة، حيت خاص أرباب الحمامات يكلسو على طاولة الحوار مع العامل ورئيس الحكومة، ويعرفو بشاكلهم بمجلس المستشارين، عاد يقدمو على التظاهر، وكذلك حيت الحالة الوبائية دالبلاد ماكتسمحش.