اسماء غربي- كود//

قررات السلطات في فرنسا تشد المغربي ألكسندر بنعلا، الحارس السابق ديال الرئيس الفرنسي ايمانويل ماكرون فالحبس حيت ضاسر ومحتارمش تدابير المراقبة القضائية.

السيد لي منوض روينة في فرنسا، من بعد ما بان في فيديو ماي الماضي كيفرشخ فجوج ديال الفرنسويين كانو دايرين مظاهرة، وانتحل صفة رجل أمن قبل ما يتفرش، داير مابغى وگالس كيسافر وينقز قبل ما يشدوه.

تم استدعاؤو البارح من قبل قضاة التحقيق المسؤولين على القضية، وفي الاخير خداو القرار ديال يبقى رهن الاعتقال.

ألكسندر هو فرنساوي من أصل مغربي، تولد في مدينة إيرفو الواقعة بمنطقة النورماندي، وكبر في منطقة شعبية سميتها “لامدلين”.

من ماي الماضي سميتو ولات متداولة من بعد قضية تعنيف بنت وولد كانوا متظاهرين، ومن ديك الوقت صحافة الفرنسية مكترحموش، وديما كتجيب ليه الأخبار ديالو، لي كتنوض صداع في الايليزيه.