هشام اعناجي – كود الرباط//

[email protected]

تزامنا مع الجدل الدائر حول التقاعد الاستثنائي الذي استفاد منه عبد الاله بنكيران، رئيس الحكومة السابق، كشفت مصادر برلمانية لـ”كود” أن رئيس مجلس النواب، يواجة أزمة “تقاعد البرلمانيين السابقين” بسبب وضعيتهم الاجتماعية المزرية، وذلك على بعد أسابيع قليلة من تجديد هياكل مجلس النواب.

واستقبل المالكي صباح اليوم الخميس 7 فبراير الجاري، أعضاء تنسيقية النواب البرلمانيين السابقين، وذلك لإيجاد حلول معقولة قبل أن يتوجهوا إلى المحكمة الإدارية خصوصا وأنه منذ عامين تقريبا وتقاعد البرلمانيين متوقف رغم أن البرلمانيين الحالين باقي كيساهمو فصندوق التقاعد التابع لصندوق الايداع والتدبير، باقتطاع 2900 درهم لكل برلماني.

وقال نور الدين مضيان، رئيس الفريق الاستقلالي بمجلس النواب، في تصريح لـ”كود” إن “مكتب المجلس معندوش الجرأة باش يفك هاد المشكل وكاينين حالات اجتماعية كتعاني ومعندهاش باش دير عمليات جراحية ومعندهاش باش تخلص الدواء”.

وأوضح مضيان لـ”كود” أن الحل هو اصلاح صندوق التقاعد لكن بتمويل ذاتي بلا مادخل الدولة، والحل الثاني هو التصفية ونرجع لناس فلوسهم لي تحطو فالسي دي جي”.

وتابع المتحدث :” الغريب فالأمر كاين اقتطاع ب 3000 درهم تقريبا والتقاعد واقف هادي عامين غير بغينا نفهمو فين كيمشيو الفلوس” مضيفا :”هذا عبث مخصش يستمر”.

وكشف مضيان أنه أحال حالة اجتماعية صعبة لبرلماني سابق على مكتب الحبيب المالكي للنظر في حل لوضعيته والمساهمة له لإجراء عملية جراحية.

وحسب مصادر مطلعة فإن المالكي، اللي لقا راسو فورطة، وباغي يفك الحريرة قبل انتخاب هياكل المجلس لي غايكون فشهر ابريل، حاول فاللقاء يصبر تنسيقية البرلمانيين السابقين، وواعدهم باش يلقاو حل في أقرب وقت ممكن.

طبعا المالكي لاح الكرة فاللقاء للأغلبية الحكومية، الأخيرة لي مزال واحلة فالصيغة باش يتحل مشكل افلاس صندوق التقاعد، الأخير لي عندو ارتباط وثيق بصندوق الايداع والتدبير ولي طرحات تساؤلات حول اموال تقاعد البرلمانيين فين مشات.

فخلال العامين الماضيين، فإن صندوق الايداع والتدبير يكون اقتطع الملايير من تعويضات البرلمانيين.

ويبقا السؤال اذا فشل مكتب مجلس النواب وفشلات الاغلبية ثاني فالتوافق على هاد الموضوع، واش المالكي غايراسل الديوان الملكي باش يفكون هاد روينة ديال التقاعد ولا غايديرو تأجيل الأزمة؟.