نجوى المالحي-كود//

المغني سعد لمجرد دار نهار الجمعة ثاني حفل ديالو من بعد توقف دام 3 سنين بعدما تورط في قضايا اغتصاب  في فرنسا، والقضاء مازال مقالش كلمتو الاخيرة فيهم.

التبرگيگة لي جابت “كَود” أن لمجرد دار فريق مغربي 100% فيه كثر من 15 لواحد بين المسؤولين في التواصل والتصوير والشطيح وكل ما كيتعلق بيه.

والشرط لي دار لمجرد أن أي واحد دخل خاص يكون محل ثقة، والمقابل هي يلمعو ليه صورتو ويبعدو على المشاكل لأنه عاد كيحاول يرجع كيفما كان بعد الشوهة لي حط فيها راسو وتورط في 2 قضايا اغتصاب في ظرف 3 سنوات.

لمجرد لي مستقر في فرنسا وولا مؤخرا كايدخل للمغرب وكيتلاقا بشكل مباشر مع كل شخص غادي يدخل للفريق ديالو، وكيدير معاهم عقود صارمة وقاصحة وبزاف منهم فارض عليهم مايذكروش اسمو واخا خدامين معاه ويبقاو في الخفاء، ويقادو ليه صورتو لي كلات العصى مزيان.