عفراء علوي محمدي- كود//

هذي المرة الثانية اللي كتعلن فيها شركة رونو- نيسان فطنجة على الإغلاق ديالها، فالمرة اللولة كانت بسبب تسجيل بؤرة لفيروس كورونا المستجد فصفوف العاملين ديالها، ودابا امتثالا لقرار والي الجهة، القاضي بإغلاق جميع الوجدات الصناعية فمدينة طنجة.

مصنع رونو فطنجة حبس الخدمة ابتدام من 27 يوليوز، وغادي يستمر حتى ل11 غشت الجاي.

ولبارح، اصدر والي جهة طنجة تطوان الحسيمة، محمد امهيدية، قرار بتعليق النشاط الصناعي فمدينة طنجة، ابتداء من الثلاثاء 28 يوليوز وإلى غاية 12 غشت الجاي.

هذ القرار جا، بعدما دار الوالي اجتماع مع ممثلي ورؤساء المناطق الصناعية فعاصمة البوغاز، واللي توصلو من خلالو بقرار إغلاق المصانع والوحدات الصناعية، بسبب تزايد حالات الإصابات بفيروس كورونا وظهور مجموعة من البؤر الصناعية فالمنطقة، وبوثيرة سريعة وخطيرة.

وكان سبق للجمعية المغربية لحقوق الإنسان دعات لإغلاق المعامل والمصانع فطنجة، وعلى راسها معمل رونو.