لكن وزارة ناصر بوريطة اللي عطات ترخيص لشركة “العال” الاسرائيلية تجيب شي 150 مسافر من تل ابيب للراشيدية كيف نشرنا ف”كود”٬ عطات كذلك تراخيص ل4 شركات طيران خاصة =جيت بريڤي= باش دخل اللي بغى للمغرب.
هاد الفرصة الوحيدة المتاحة للمغاربة يدخلو لبلادهم غالية وما يقدر عليها الا ناس قلال. باش تكون عندكم فكرة٬ “كود” دارت اتصالات مع هاد الشركات وجابت الاثمنة. “جيت بريڤي” من باريس لكازا وحسب نوعية الطيارة تقدر توصل ل25 الف اورو اي كثر من 25 مليون سنتيم. طبعا مغاربة كثار كيف توصلات ليه “كود” كيفضلو يجيو لمالگا جنوب اسبانيا وكيكريو طيارة من هاد الشركات ب4 اللي كتكلف بكاع التراخيص لزبناءها واللي دورات الحركة مزيان مزيان٬ من هاد المدينة الاسبانية لكازا او حتى لطنجة القضية كتطلع رخيصة.
كاين طيارة كتهز 8 اشخاص كتكرى ب8243 اورو وكاين اللي رخص غير ب4 الاف اورو ولكن كتهز 5 الاشخاص وكاينة وحدة كتهز 7 الاشخاص وكتطلع ب5 الاف اورو. هادي هي الرخيصة حقاش ايلى لقيتي 7 دالناس وقسمتيها علي 5 الاف اورو غادي تطلع الرحلة لكل واحد 714 اورو.
اما ايلى كنتي باغي توصل لكازا فالثمن كيطلع. كاين طيارات خاصة ب7 الاف اورو وكاين ديال 8 الاف وكاين ديال 9 الاف وكتهز 7. علي حساب الكونفور والنوع وجودة الخدمات.
دابا كاين اللي كيجمع 7 او 5 او 6 الناس ويجيو فهاد الطيارات. شوهة كبيرة واهانة لكلشي. شوف على مغرب كيوجدو اللي كيسمي راسو مول لمقص.
دابا هاد الشي فضيحة وكيضرب فالمقال الاول كذلك “لارام”. علاش تعطي لشركات خاصة هاد المارشي ولارام كتموت.
ديرو طيارات “ا تي ار” الصغيرة ديال الفرفارة وخليها تجيب الناس. راه العدد كيكون قليل وهي غادية دير الرواج. وعلاش اصلا هاد التخربيق. واش الحدود مفتوحة ولا مسدودة. ايلى مسدودة راه مسدودة على كلشي. الاستثناءات هم رجال الدولة. ولا مفتوحة خاصها تكون للجميع كذلك.
دابا فبلادنا باش ترجع لبلادك اما خاصك تكون تعرف الباز مول “تريا” اللي عطاه بوريطة ترخيص لرحلة “العال” من اسرائيل للمغرب او خاصك تكون عندك لفلوس باش تاخد “جيت بريڤي”. مول هاد لفضايح هو وزير الخارجية والتعاون ناصر بوريطة. هو اللي كيسمح شكون يدخل ويرخص ليه.