كود – الرباط//

بعد إجماع رواد مواقع التواصل الإجتماعية على أن مبادرة البلجيكيات إنسانية ومستحسنة، النائب البرلماني علي العسري من حزب العدالة والتنمية، ناض هاد الصباح ساخن عليه راسو، وبدا كيتهكم على البلجكيات لي جاو لتارودانت في عز الصيف، وقادو طريق جبلية لقاوها حالتها حالة، بأنهم جاو باش ينشرو العرى في بلد معروف عليه انه محافظ.

النائب البرلماني عن الحزب الإسلامي الحاكم، قال أنهم جاو متافقين ولابسين ملابس ديال البحر، وتساءل عن رسالة هاد الزعرات، وواش هاد الخطوة هدفها إنساني أم شيئ آخر.

وبلا حشمة قال أن الكل يعرف مدى تشدد الأوروبيين في ضمان شروط السلامة عند كل أوراش البناء والتصنيع، للحد الذي لا يسمح فيه للزائر بولوج أي مصنع أو ورش، صغر أو كبر، دون لبس وزرة سميكة، تغطي كل الجسد، مع خوذة للرأس و مصبعيات اليد.. هاد البرلماني قاليك كولشي عارف مدى تشدد الأوروبين. وراه غير انتا اللي كتعرف هادشي والأمثال ديالك اللي مكبوتين. الناس فاوروبا معندهومش هاد الافكار اللي عندك.

كاين شي عينة ديال الناس وخاصة السياسيين عندهوم أفكار قديمة ومكلخة، وبحال هادو اللي ماصالحينش يديرو السياسة.

هاد البرلماني المكبوت وكان فيه الخير وكان يمشي يدير شي مبادرات بحال هادشي اللي دارو البلجيكيات فالمنطقة اللي صوتو عليه فيها الناس ماشي ينوض يهضر على أجنبيات عندهوم أفكار ودارو مبادرة زوينة بزاف.

هادشي من بعد ما الفرقة الوطنية للشرطة القضائية بتنسيق مع مصالح المديرية العامة لمراقبة التراب الوطني، قرقبات العشية ديال الاثنين على أستاذ للتعليم الابتدائي، في عمرو 26 سنة، لاشتباهه في قضية تتعلق بالإشادة والتحريض على ارتكاب أفعال إرهابية ضد نفس البلجكيات، حيت كتب ففيسبوك انه خاصهم يقطعو ليهم ريوسهم.