كود كازا ///

ببيان وزارة الداخلية البارح اللي علنات فيه النتائج النهائية للانتخابات التشريعية والبلدية والجهوية واللي عطات فوز كبير للتجمع الوطني للاحرار ب102 مقعد فمجلس النواب و9995 فمجالس الجماعات والمقاطعات٬ تكون سالات اخر مراحل اعلان النتائج.

دابا بعد الاعلان النهائي يمكن لرئيس الدولة يكلف فاي وقت بغى باعتماد الفصل 47 من الدستور٬ رئيس الحكوم من الحزب الفائز اللي هو التجمع الوطني للاحرار. غادي يكون من العبث تعيين سياسي اخر من هاد الحزب من غير السياسي اللي حلق بحزبو عاليا ودكدك البي جي دي وربح رباح واعر اللي هو رئيس الحزب عزيز اخنوش.

اللي وقع نهار لاربعا فالانتخابات كيفرض الاسراع فتعيين رئيس الحكومة باش يشكل اغلبيتو. لمغاربة بغاو الخدمة تبدا اليوم قبل غدا. بغاو يشوفو حكومة فاقرب وقت. طبعا خاص رئيس الدولة يطلقنا للفراجة وصافي.