عفراء علوي محمدي- كود//

علن الأستاذ المسؤول على تأطير الأطر الطبية فمجموعة من المراكز الصحية فبروكسيل، نبيل أكنوش، بللي تصاب بفيروس “كورونا” المستجد.

أكنوش، المؤطر الصحي والأديب والشاعر المغربي المعروف على مواقع التواصل الاجتماعي، دار تدوينة ليه قبل قليل فالساعات اللولة من صباح اليوم السبت، كيقول فيها بللي المرض “اللعين” قضا عليه.

وقال أكنوش فالتدوينة على حسابو الرسمي ف”فيسبوك”: “للأسف تعرضت لتدهور صحي اليوم مما دفعني إلى العودة إلى المستشفى… أنا الان في المستعجلات… والكوڤيد اللعين بوزيتيف”.

وطلب أكنوش من الناس يبقاو فديورهم، واعتذر منهم لكونو مكايجاوبش على الاتصالات والرسائل بسبب وضعو الصحي المتدهور.

وكانت “كود” نشرات تصريح لاكنوش، منذ اسابيع، تحدث فيه على العمل ديالو فبلجيكا، وكيفاش كيأطر الممرضين والمسعفين، وكيفاش كيحتك بشكل مباشر مع مرضى “كورونا”.

وسبق لأكنوش كشف ل”كود”, بللي دار التحاليل هو والزوجة ديالو، اللي كتخدم ممرضة، باش يعرفو واش مصابين بالفيروس ولا لا، لكن التحاليل تعطلو فالخروج نظرا للكم الأهائل اللي كيتجرى ديال “البريليفمون” فالنهار الواحد فبلجيكا.

وكان وصف، فتصريحو ل”كود” دائما، كيفاش الناس مخلوعة فبلجيكا، بحال فاش كانت مخلوعة من الأعمال الإرهابية وولا كلشي شي شاك فشي، لكن فنفس الوقت كيقول بللي الناس واخدين احتياطاتهم بشكل كبير، وبزاف دايرين الكمامات، وملتزمين بالطرف الوقائية.

ولحد الساعة، وحسب آخر الأرقام، بلغ عدد الإصابات فبلجيكا بالفيروس ل7 آلاف 284 إصابة، الوفيات تجاوزو سقف 300 وفاة، واللي تشافاو بلغ العدد ديالهم 858.