عفراء علوي محمدي- كود//

بعدما مشا للصبيطال العسكري فالرباط، قال عبد القادر اعمارة، وزير التجهيز والنقل واللوجيستيك والماء المصاب بفيروس “كورونا”، بللي صحتو بيخير، ونفا الأخبار اللي كاتروج بشأن تدهور الصحة ديالو، وحذر من نشر الأخبار المغلوطة اللي كتخلع الناس.

وقال اعمارة، فتدوينة ليه على موقع التواصل الاجتماعي “فيسبوك”، بللي المغرب فحاجة لجنود الخفاء اللي كيخدمو بللي ل والنهار باش يتجاوز المغرب هذ الوباء، وخاص الناس يساعدوهم بالبقاء فالديور ديالهم.

https://m.facebook.com/story.php?story_fbid=2907099176014191&id=289579197766215

وفتصريح معمم ليه، قال عزيز الرباح، وزير الطاقة والمعادن والبيئة، بللي اتصل بعبد القادر اعمارة، وزير التجهيز والنقل واللوجستيك والماء، وأكد ليه بللي مشا للصبيطار بسبب فيروس “كورونا”، وهو الآن فقسم العناية وماشي قسم الإنعاش كيف كيروج.

مصادر أخرى كشفات ل” كود” بللي الوزير خاصاه عناية أكثر ومراقبة خاصة اللي ما يمكن تتم إلا فأحد المراكز الاستشفائية، لكن فالمجمل وضعيتو الصحية مستقرة ولا تدعو للقلق.

وكان علن الوزير اعمارة على إصابتو بفيروس “كورونا” على الصفحة ديالو بموقع التواصل الاجتماعي “فيسبوك”، وكان متبع العلاج ديالو فالدار، فين دار الحجر الصحي هذي سيمانة تقريبا، على اعتبار أن الحالة ديالو ماكاتحتاجش للصبيطار فداك الوقت.

وكان اعمارة تلاقا مع أعضاء الحكومة فاجتماع المجلس الحكومي، الشيء اللي خلا جميع أعضاء الحكومة اللي حضرو الاجتماع يديرو التحاليل باش يشوفو واش تقاسو بالفيروس ولا لا، لكن التحاليل ديالهم خرجات سلبية.