نجوى المالحي – كود //

ختارت المغنية الشعبية زينة الداودية أنها تتعامل مع مغني الراي الجزائري الشاب بلال في أغنيتها الجديدة لي خرجات لبارح الاثنين، ولي ختارت ليها عنوان “سكتو عليا”.

الشاب بلال لي كيحظى بشهرة كبيرة بزاف في المغرب هو لّي تكلف ليها بالكلمات والألحان.

وكان الجمهور المغربي عبر على الغضب ديالو من الشاب بلال لي دار تصريح في الجزائر وقال أنه معندو ميدير بالجنسية المغربية، واخا كان نهار ومطال وهو محيح في المهرجانات عندنا.

البدايات ديال زينة الداودية كانت بالراي قبل ما تبدل الطريق وتبدى تغني الشعبي لي لقات فيه بلاصتها وقدرات تشهر بيه اكثر، ودابا كتلبي رغبات العشاق ديالها لي كيبغيو يسمعوها كتغني الراي.

وكانت آخر أغنية ديال زينة الداودية بعنوان “آش بيني وبينك” لي خرجاتها هادي جوج سيمانات قبل دخول 2021، ولكن حققات نسبة مشاهدة قليلة مقارنة مع الأغاني السابقة ديالها.

https://www.instagram.com/p/CJ6BFRUhNSJ/?utm_source=ig_web_copy_link