سهام البارودي – كود//

واخا القانون فالمغرب مازال خاصو بزاف باش ينصف المرأة ! وواخا الفضاء العام فالمغرب ماشي شي فضاء لي كايشجع المرأة ! وواخا مازال عندنا ثقافة الاغتصاب و و و و …. واخا هادشي كلّو أحسن وقت عاشت فيها المرأة المغربية هي الوقت الحالية ! هي دابا ! 2023 ! عندها الحق تقرا بعدا …شحال هادي العيالات كانو الاغلبية الساحقة فيهم أميّات ! عندها الحق تخدم ! تشد بوسطات كبار و صاليرات و عندها الكونط بونكير ديالها تتصرف فيه كيمّا بغات ! تقدر تسافر ، تقدر تشري طوموبيل ، تقدر تجوج و لا ماتجوجش سوقها هاداك ، تقدر طلّق من الراجل الى مابقاتش حاملاه … تلبسي لي بغيتي ! تكون عندك الاستقلالية المادية ديالك ! شكون فحالك ؟!

احسن وقت كانعيشوها حنا كعيالات هي دابا ! عندك صوت عندك حق ! ماشي فحال شحال هادي كانو العيالات الاغلبية محگورات ! عايشات ورا الشمش ! ماتقرايش ! ماتخدميش! ماتخرجيش ! يجوجك بّاك بالراجل لي ختار ليك هوا ! لاماعجبكش الراجل ماعندك مادّيري من غير تصبري عليه ! كان خانز تصبري ! كان فمو فيه ريحة الخرا تبوسيه و تصبري ! كان مشحاح تصبري ! كان كايضربك تصبري ! كان ماكايقيمش تصبري ! عندو القذف السريع تصبري ! كان ماكايولدش نتي لي تسمى عليك ماكاتولديش ! حتى يبغي هوا يطلقك و يطلقك اما نتي ماعندك حتى حق ! و حتى نهار يبغي يتجوج عليك ماكاين لا موافقة لا ستة حمص غاتكوني جالسة كاتخيطي ليه شي جلابة مثقوبة تايتم مدخل عليك المرا يقوليك نوضي سلّمي على ضرّتك حليمة ! عجبك الحال تبارك الله ! ماعجبكش هزي حوايجك و قودي لدار بّاك تخدمي تراسة على خوتك و عيالاتهم حتى نهار تموتي !

آشمن حق كان عند المرا ؟ آشمن حق كان عند العيالات المغربيات شحال هادي ؟! والو ! حتى حق !الماكلة هي اللخرة احسن طرف د اللحم فالطبسيل كايديه الراجل حيت كايتعتابر هوا لي كايضرب تامارة و كايجيب الفلوس ! هادشي علاش ماكاين حتى سبب مقنع يخلي المغربية اليوم لي عندها عشرين ثلاتين عام يجيها حنين للباس الازمنة الغابرة ! الحايك و لا الملاوي ! اللباس ديال القرون الوسطى لي عاشت فيها المرا تحت السبّاط ! ماعندك ماتوحشي فالحايك و ماتفكري فالحايك ! اللباس لي فازگ بدموع العيالات المقهورات و المحگورات لي عاشو قبل منّك و تكرفصو و كانو غايكونو ممتنّات بزاف كون كان عندهم غا شوية من الحق لي عندك اليوم و ماحامداش الله عليه !
الحايك راه معيورة ! سبّة فحقك نتي كمرا و فحق العيالات لي تقاتلو فالعالم كامل باش يولي عندك تانتي صوت و حق و حياة كريمة كإنسان ماشي كجارية ! !