وكالات //

قرر “اتحاد البث الأوروبي” البارح الإثنين، بأن بريطانيا غادي تحتاضن نسخة 2023 من مسابقة الأغنية الأوروبية “أوروڤيزيون” (Eurovision Song Contest) بلاصة أوكرانيا اللي مزال نايضة فيها الكَيرا.

وكانت هيئة البث فأوكرانيا اللي غادي تنظم المسابقة، المذكورة اتافقات مع “بي بي سي” باش تنظم المسابقة فبريطانيا.

وهاد القرار ماعجبش بزاف ديال الأوكرانيين، خصوصا الشباب منهم اللي تفاعلو معاه عبر فمواقع التواصل الاجتماعي، واعتابرو بللي قادرين ينظمو هاد التظاهرة الفنية وخا ظروف لاكريز والكَيرا، وكيشوفو بللي هي مناسبة غتعاونهم للصمود أكثر وغيبينو بيها كيفاش حب الفن والحياة غادي يغلب الحقد والكراهية والقتيلة وكل الكوارث اللي جاتهم مع الغزو الروسي لبلادهم.

وباقي لحدود الساعة ماحددوش تاريخ إجراء هاد المسابقة بالضبط، ولا حتى المدينة اللي غادي تحتاضنها، و لكنهم مرشحين كل من مانشستر وكَلاسكَو.

وكانت أوكرانيا ربحات ال”أوروڤيزيون” ديال هاد العام، وبريطانيا جات فالمرتبة الثانية، داكشي علاش عوضاتها فالتنظيم، بسباب الكَيرا اللي منوضاها روسيا على كييف.