سهام البارودي – كود//

مؤخرا دوك صمد ! الطبيب المعروف على وسائل التواصل الاجتماعي و المثير للجدل نشر صورة ليه و كايقول بلي تعرض لاعتداء جسدي فالعيادة ديالو هادي خمسطاشر يوم !

هاد القصة خلفات موجة من الاستياء وسط رواد مواقع التواصل و بزاف ديال الناس ضامنو مع دوك صمد و عتابروه ضحية لشي مؤامرة مخطط لها لأنه مع المقاطعة و لا مؤامرة من شي جهة لي تعدات عليه حيت ” كايدافع على الحريات الفردية” ! و حتى دوك صمد فالحوارات ديالو مع الصحف و الجرائد كايقول بلي لي ضربوه ضربوه حيت ” كايهضر بزاف” و ” ماكايسدش فمو ” و قالو ليه بقا تسد فمك …. و كايحاول يوجه الناس نحو هاد لافيرسيو.

من بعد بضع ساعات بانت هضرة اخرى فالفايسبوك و للانستاغرام و بانو ناس كايقولو بلي دوك صمد راه ماتعرض لا لاعتداء لا والو و بلي السلطات لي سدات ليه العيادة و بلي راه مشا لطاليان حيت خاف و بلي ديك التصويرة ديالو مجندخ تعود لشي عملية تجميل كان دارها شحال هادي …

المهم لحد الساعة من غير واحد المقال داروه الزملاء فلاديبيش! ماكاينة حتى شي معلومة مؤكدة على شنو وقع بالضبط لدوك صمد ! و انا شخصيا كانشوف بلي هاد القصة فيها إن ! و إن كبيرة بزاف ! علاش ؟

اولا : وي المغرب ماشي هي سويسرا و كدا و الناس كاتعرض لمضايقات ( گود مثلا فايت هاكاو ليها الموقع ديالها )  ! و لكن دوك صاماد ماشي هوا المهدي بن بركة و لا رفيق الحريري  باش تنوض شي جهة تسلخو حيت ” مع المقاطعة” كيما كايحاول يروج هوا ! لطيفة رأفت مع المقاطعة و فنانين و مشاهير مع المقاطعة و حاطينها فالفايس ديالهم،  و تاواحد ما قرب ليهم هادي وحدة !

 ثانيا: بالنسبة لي كايقولو راه حقا ما حقا سلخوه حيت كايدافع على الحريات الفردية و كدا تاهادي مستبعدة بزاااف ! اصلا دوك صمد كايدافع على الحريات الفردية غا فاش كايكون وسط شي مجمع ديال الحداثيين اما قدام الكاميرا و فاش كايكون فشي بلاطو راه كايحاول ما امكن يبان دياني و ديال الله و مع ” الشعب” ، و كايفكر فحال الشعب… و كايحاول ما امكن يستميل الطبقة الشعبية لعندو و كاينتقي الكلمات ديالو بدهاء كبير.

ثالثا: دوك صاماد انسان اكتيف ! ( فالفايسبوك على الاقل و لانستاغرام) الحزقة لا حزقها كايبارطاجيها ، لقا غير الزبل حدا باب دارو دار فيديو كايغوت واك واك سحرو ليا ! نهار ليديك سيفطات ليه فاكتورة غالية دار فيديو مكشكش عليهم ! كيفاش واحد اكتيف و كايستاغل اي مناسبة باش يبان و يثير الانتباه غادي يتسلخ و تخلا دار بوه و يسكت عليها خمسطاااااشريووووم ! تا يسافر ! و يبعد ! و يبرا ! عاد يلوح التصويرة ديالو فاش كلا قتلة ؟

رابعا : دوك صمد رحل من مقر العيادة ديالو و كايقول باي ” بدلت العنوان ديال العيادة باش مايجيوجش يتعداو عليا فيها” ؟ علاه هاد السلاگط حماق يعاودو يجيو يسلخوك فنفس البلاصة لي سلخوك فيها و هوما عارفين بلي راك حاط شكاية و داير الشوهة فالفايسبوك !؟

و علاه گاع لاكانو باغين يسلخوك عاوتاني غادي يحيرو يلقاو العيادة ديالك! ياك طبيب ؟ غير فگووگل غايلقاوك فين حال ( العيادة) عاوتاني !؟ اولا ؟

بزاف ديال نقط الاستفهام فهاد القصة ! لي كانظن عكس ما يروج لها ! ماعندها علاقة لا بالمقاطعة لا بالحريات الفردية ! و هاد النقط خاصهم يتوضحو فالقريب العاجل ! باش لاكان فعلا دوك صمد تعرض للتعنيف وسط العيادة ديالو يتلقاو الجناة و يتعاقبو ! و لا كانت هاد القصة من وحي خيال الكاتب نعرفو الاسباب لي خلاتو يختالق هاد القصة.