كريم الشركي – كود //

من مهندس للطرق والقناطر إلى وزير، هادي هي حكاية الكثير من المسؤولين ف بلادنا، من بينهم وزير الداخلية عبد الوافي لفتيت، وحتى محمد عبد الجليل اللي تعين لبارح وزير للنقل واللوجستيك.

تولد عبد الجليل في 1968 بالرباط، و سبق ليه خدم  كرئيس مجلس إدارة شركة “مرسى ماروك” اللي كتحكم فموانئ المغرب وشرف فيها على تسيير 3600 موظف.

الوزير الجديد، اللي منتمي لرابطة المهندسين داخل حزب الاستقلال، خدا الباك عام 1985 من ليسي “ليوطي”، ومشى لفرنسا باش يكمل قرايتو، ومن تماك تخرج في 1991 من المدرسة الوطنية للقناطر والطرق Ponts et Chaussées.

بعدها خدا الماستر فإدارة الأعمال من المدرسة الحسنية للأشغال العمومية، وبدا حياتو المهنية فشركة “آرثر أندرسن” فباريس اللي وظفاتو كمدقق حسابات، وبقى خدام فيها حتى لـ1993، من بعد رجع للمغرب وخدم في شركة “بيمارو” التابعة لـ Bouygues.

وولا عبد الجليل مدير تجاري لفرع شركة Bouygues في المغرب، قبل مايخدم في 2003 كمدير للبرامج والدراسات في وزارة التجهيز في عهد الاستقلالي كريم غلاب.

وفي دجنبر 2006 التحق محمد عبد الجليل بشركة “مرسى ماروك”، وبقى غادي حتى ولى مدير مجلس ادارتها، قبل ما يعينو الملك محمد السادس، وزير للنقل واللوجيستيك.