كود هناء ابو علي ///

برلمان حزب الاتحاد الاشتراكي للقوات الشعبية المنعقد فالرباط فاتجاه الاعلان عن المشاركة فالحكومة. طبعا قرار المجلس الوطني للحزب اللي غادي يتاخد ماشي مفاجئ. المفاجئ اللي يقدر يكون دابا هو موقف عزيز اخنوش رئيس التجمع الوطني للاحرار المكلف بتشكيل الحكومة.

غاليا غادي يكون قرار برلمان الحزب هو :التفويض للكاتب الاول للحزب اي ادريس لشكر باش يستمر فالمفاوضات.

دابا التوقعات كتمشي باش يكون تحالف ثلاثي بين الاحرار والبام والاستقلال. تحالف هجين خاصة دخول البام الغريب لهاد الحكومة. امين عام هاد الحزب دار حملة كلها ضد اخنوش ودابا بوقاحة باغي يشارك وياخد منصب حكومي. الله الله علي بالمعقول نزيدو القدام.

حزب الاتحاد الاشتراكي مكانو الطبيعي من خلال السنوات الخمس الاخيرة لتصرفاتو هو الحكومة. هو الحزب الوحيد اللي كان حليف حقيقي للتجمع الوطني للاحرار.

حتى الاستقلال كانو انتهازيين فهاد الفترة. دابا ايلى بقى هاد الحزب فالمعارضة راه الخاسر الاكبر ماشي هو بل حليفو الاحرار.

كاينة بعض القيادات فالاحرار كدافع على عدم اشراك الوردة. هادو كيحركهم مصالح اكثر منها مواقف سياسية.

دابا باش يعلن الاتحاد علي مشاركتو فالحكومة غادي يتحرج بالاساس الاحرار.

حسب مصادر “كود” يتوقع غدا يكون لقاء بين ادريس لشكر الكاتب الاول للحزب وعزيز اخنوش رئيس الحزب ورئيس الحكومة المكلف بتشكيلها.